Sudán del Sur tien lluz verde pa la so independencia

|

El presidente de Sudán, Omar Hassan al Bashir, decretó oficialmente que "respeta y acata" los resultaos del referéndum sobre la independencia del sur del estáu celebráu’l 9 de xineru que güei dio a conocer la Comisión Eleutoral. Los habitantes de la parte meridional de Sudán apoyaron la so dixebra del norte con un 98,83 por cientu de los votos.
 
"Anunciamos que respetamos y acatamos la decisión del pueblu del sur de Sudán y el resultáu del referéndum", declaró'l ministru d'Asuntos Presidenciales, Bakri Hassan Saleh, mientres la llectura del testu del decretu ante la televisión estatal. Pese a la separación del país, el presidente sudanés aboga pol mantenimientu “de los llazos ente’l norte y el sur”, asina como na cooperación ente dos zones qu’algamaron la independencia de la corona británica nel 1956.
 
Según los acuerdos de paz firmaos nel 2005, la independencia del sur de Sudán va ser efectiva a partir del 9 de xunetu. Juba será la capital del país y el nome del estáu nuevu africanu, tovía ensin determinar, podría ser Sudán del Sur.

Contador Estadistiques