Subvenciones pa pomares

Ta abiertu'l plazu pa pidir les subvenciones pa la plantacion de pomaraes de la Conseyería d'Agricultura. Anque salieron con un poco de retrasu, esti añu la cantidá de perres que se reparten da un reblagu, pasando de 15 millones de pesetes a cerca de venti (120.000€). Nun ye mala anuncia, agora que ta pa salir el reglamentu que controlará la producción de sidra con denominación d'orixe, un documentu nel que van pautase, ente otres coses, les clases de mazana qu'entrarán a la denominación, una cuestión que tien bastante miga. N'Asturies danse más d'ochocientes variedaes de mazana, pero cola denominación les más d'elles van quedar fuera, una cuestión que plantega problemes. Anque de mano el Serviciu d'Investigación y Desarrollu Agroalimentariu (Serida), trabayaba con un catálogu de doce variedaes que consideraba más convenientes pa facer sidra, parez qu'esi garrapiellu va enanchase hasta más de venti variedaes.Cuando n'otros llugares como Euskadi la sidra yá ta afitada como una industria agroalimentaria seria, el sector nun acaba d'esconsonar n'Asturies. La web ye bon espeyu d'esta situación, y ello ye que la fueya de la Mesa interprofesional de la Mazana y de la Sidra lleva yá dos años ensin actualizase.