Suburbia edita obres de Xurde Fernández y Ruma Barbero

La editorial asturiana Suburbia Ediciones vien d’anunciar la edición de dos nueves obres. Son “Intentu d’escritura”, segunda novela en solitariu de Xurde Fernández y el cómic de Ruma Barbero “Manzajú”.

“Intentu d’escritura” ye una novela adulta d’estructura complexa que pue ser incluyía dientro del xéneru negro. Nella, Xurde Fernández fai una reflexón sobre’l oficiu d’escritor, les obsesiones, o l’amor, al traviés d’una rede de personaxes con vides rotes.

Esta ye la segunda novela en solitariu de Xurde Fernández. Ente les obres d’esti candasín alcuéntrense, ente munches otres, “Volver”, primer colección de cuentos curtios publicada en 2007; “El color del escaezu”, escrita xunto cola escritora Marian García; o “Díes d’iviernu”, obra cola qu’algamó’l Premiu Llorienzu Novo Mier.

Cómic asturianu
“Hebo un tiempu nel que n'Asturies nun había más autopista que la "Y", l'Sporting de Xixón quedaba segundu na lliga, los güelos entamaben a falar del so pasáu y los neños bebíen resfrescos asturianos”, estes palabres resumen “Manzajú”, l’últimu cómic del músicu y dibuxante Ruma Barbero.

“Manzajú” ye la novela gráfica pola que Barbero algamó’l I Premiu de Comic Alfonso Iglesias que convoca’l Principáu d’Asturies. Nesta obra, el protagonista viaxa’l pasáu de la so vida, rememorando con sentíu del humor pasaxes de la infancia de  toa una xeneración de mozos y moces asturianes.