Suburbia Ediciones va presentar esti vienres nel Trisquel el poemariu billingüe de Larry Derdeyn

Xixón y Navelgas son los llugares escoyíos por Suburbia pa la presentación de dos de los sos novedaes últimes. La del llibru del estauxunidense va celebrase'l vienres nel Trisquel, mentes que'l día 24 va ser el turnu del poemariu de Cristina Menéndez.
 
L’eventu del Café Trisquel va principiar a les 21.30 hores y nél van participar l’autor del poemariu billingüe ‘Mountain’s silent shout. El gritu silenciosu de les montañes’, Larry Derdeyn, y Fran Molinero, traductor al asturianu del trabayu del de Connecticut xunto con Silvia Cosio. Esta obra trátase d’una declaración d’amor de Derdeyn al paisaxe asturianu compuesta por dellos poemes escritos nel conceyu de Villayón que van acompañaos de semeyes feches pol propiu autor, destacáu músicu creador del Larry Derdeyn Tríu. Tres l’actu de presentación, va tener llugar l’actuación del grupu La Colmena.
 
Otra manera, ‘Pallabres sin dicir’ ye’l nome de la obra de Cristina Menéndez Martín (Mieres, 1984), poemariu de corte intimista que supón la primera espublización d’esta maestra d’educación especial y esperta en Filoloxía Asturiana pola Universidá d’Uviéu. Enantes, yá escribiere dalgún cuentu pa rapazos y rapaces y poemes, en castellanu y asturianu, llegando ún d’ellos, ‘Iviernu’ –incluyíu nesti llibru–, a salir en ‘Lletres Asturianes’. La presentación d’esti trabayu va tener llugar el xueves 24, a les 19 hores, na Biblioteca Pública de Navelgas.
 
Estes dos obres componen les novedaes últimes del catálogu de Suburbia Ediciones, al que tamién hai que sumar el poemariu ‘Despididia’, de Pablo Antón María Estrada.