Suburbia Ediciones espubliza la obra de Marta Mori ‘La mio voz’, premiu Xuan María Acebal

La editorial Suburbia Ediciones y el Gobiernu d’Asturies tan acabantes d’espublizar la obra ‘La mio voz’, de la xixonesa Marta Mori. Esti llibru de poemes foi ganador l’añu pasáu del Premiu Xuan María Acebal.
 
‘La mio voz’ trátase d’un poemariu intimista que muestra la brillantez de Mori (Xixón, 1965), primera autora en llevase’l Premiu Xuan María Acebal. Sicasí, Mori yá cuenta con dellos galardones de primer nivel, como’l Premiu Teodoro Cuesta de poesía de los años 2002 y 2004 –nesti casu últimu ex aequo– colos sos trabayos ‘Pórticu’ y ‘El tiempo de la espera’, de forma respeutiva.
 
El xuráu que concedió'l Xuan María Acebal tuvo presidíu pola xefa del Serviciu de Política Llingüística, María Antonia Pedregal Montes, y nél participaron los escritores Miguel Allende, Aurelio González Ovies y Esther Prieto, que fallaron pola obra de Mori por unanimidá. El xuráu destacó que se trata d'un poemariu intimista y emocionante, mui bien trabayáu n’estilu y forma, y nel que s'afilvanen imaxes que conformen un conxuntu de gran espresividá y riqueza.
 
Suburbia Ediciones, que yá tien a la venta esta obra por un preciu de 12 euros, avanzó un poema de ‘La mio voz’ que tien por nome ‘Como la flecha’:
 
Como la flecha qu’aguarda
en manes del arqueru
y toma aire,
acolumbrando’l blancu,
que tovía se divisa llonxanu
y semáu de promeses...
 
Como la flecha que danza
vertixinosa nel aire,
mientres avanza,
sola,
impulsada pol deséu...
 
Como la flecha que xifla,
como la flecha que cuerre,
como la flecha qu’espera.
 
Como la flecha...