Suburbia Ediciones edita trés títulos nuevos en llingua asturiana

‘Nos prietos abilsos’, de Carlos X. Blanco; ‘Un palaciu enllenu ortigues’, de Pablo Antón Marín Estrada; y ‘Contra’l silenciu’, de Berto García, son los trés títulos últimos de Suburbia Ediciones n’asturianu. Ésti últimu ye una antoloxía d’autores asturianos.

 

El testu de Blanco trátase d’una coleición de rellatos de terror na qu’esti profesor en Ciudad Real y Doctor en Filosofía pola Universidá d’Uviéu conduz a los llectores “pelos mundos del terror y lo fantástico” con histories qu’homanexe a Lovecraft. Pa ello, el xixonés usa un estilu “claru ya amenu”, convirtiendo ‘Nos prietos abilsos’ nuna “rara avis dientro de la tradición narrativa asturiana que va facer les delicies de los amantes del xéneru fantásticu”, espliquen dende la editorial. Esti trabayu, con un preciu de 14 euros, ye’l númberu 3 de la coleición ‘Quemando cromo’ de Suburbia.

 

‘Un palaciu enllenu ortigues’ fórmalu tamién una serie de rellatos, anque estes histories de Marín Estrada percuerren “distintes xeografíes, tanto físiques como mentales que nun van dexar indiferente al llector”. Númberu 16 de la coleición ‘Mecánica popular’, el llangreanu amuesa con esti trabayu por qué ye ún de los meyores escritores del país. El preciu del llibru ye tamién de 14 euros.

 

Poesía de los trenta años últimos

 

El tercer llibru de Suburbia ye una antoloxía poética dende los tiempos del Surdimientu hasta anguaño fecha por Berto García, de nome ‘Contra’l silenciu’. “Esti llibru ye una cenciella pero, al empar, completa esbilla de poesía del Surdimientu, cola qu’afitar que l’asturianu tien una puerta abierta al futuru. Esta compilación quier ser una referencia, un puntu d’arrinque pa quien s’avere a la poesía en Llingua Asturiana; un escaparate onde poder ver lo meyor de la creación na poesía llariega y qu’afale l’enclín por siguir conociendo y andando’l camín de la poesía contemporánea n’asturianu. Frutu d’un llargu procesu d’afondamientu tienes, agora nes tos manes llector, una amuesa d’esta estaya de la lliteratura, na nuesa llingua, nos últimos trenta años”, esplica nel llibru’l compilador, que presenta una obra de cada autor –alredor d’un centenar– con una referencia a tola so trayeutoria. Esti trabayu indispensable, con un preciu de 12 euros, ye’l númberu 13 de la coleición de poesía ‘Males tierres’ de la editorial xixonesa.