Suburbia Ediciones edita trés poemarios, ún d’ellos billingüe asturianu-inglés

‘Despidida’, de Pablo Antón Marín Estrada; ‘Pallabres sin dicir’, de Cristina Menéndez Martín; y ‘Mountain’s silent shout’, de Larry Derdeyn, son les trés espublizaciones últimes de Suburbia Ediciones. Toos estos llibros son poemarios.
 
La obra de Derdeyn, tornada al asturianu por Fran Molinero y Silvia Cosio, destaca por ser billingüe, yá que tamién recueye los poemes orixinales d’esti autor norteamericanu afincáu n’Asturies escritos en Villayón y inspiraos nel paisaxe del nuesu país. ‘El gritu silenciosu de les montañes’ vien amás acompañáu de semeyes qu’ilustren caún de los poemes escritos por esti artista que tamién destaca nel ámbitu musical, onde ye conocíu por lliderar el Larry Derdeyn Trio.
                          
Ente estes obres qu’ufre a los llectores Suburbia Ediciones atopamos la vuelta a la poesía de Pablo Antón María Estrada cuatro años depués de ganar nel 2007 el Premiu Acebal. “’Despidida’ ye un poemariu impresionante que reflexa la capacidá poética del autor, un poemariu estensu sobre la muerte, el dolor y la memoria”, resalten dende la editorial.
 
Completa esti tríu de poemarios, ‘Pallabres sin dicir’, obra que supón l’estrenu de Cristina Menéndez Martín. Nacida en Mieres nel añu 1984 y residente n’Uviéu, esta autora de dellos poemes inéditos en castellanu y de dellos cuentos pa rapazos y poemes na llingua del país, espubliza’l so primer poemariu, de corte intimista. “’Pallabres sin dicir’ abre un nuevu camín. Toi seguru de qu’esti camín pasará por munchos otros volúmenes y poemes, afondando asina’l llabor estéticu de les nueves voces de la poesía asturiana, que necesita, que sigue necesitando, almes nueves”, resalta Roberto Gónzalez-Quevedo sobre’l trabayu de Menéndez Martín.