Suburbia Ediciones asoleya’l poemariu ‘Los nomes de la lluvia’, d’Ana Rosa Fernández

La escritora sotrondina Ana Rosa Fernández ta acabante d’espublizar ‘Los nomes de la lluvia’. Esta obra, editada por Suburbia Ediciones, compón el númberu 9 de la coleición ‘Males tierres’, destinada a dar a conocer a poetes asturianos.
 
‘Los nomes de la lluvia’ ye un poemariu maduru, íntimu, que fala del pasu'l tiempu, les ilusiones perdíes, les espectatives rotes...; too ello ilustrao poles semeyes d'Ana Jambrina Huete”, espliquen dende Suburbia, editorial que califica la obra de Fernández como “una muestra más de la calidá y fondura de la poesía fecha n'asturianu y más concretamente de la poesía fecha por muyeres en llingua asturiana”. Pese a ser una escritora veterana, con un currículu ampliu, la escritora de Sotrondio ye una voz poco conocida nel panorama de la poesía asturiana.
 
Nacía nel añu 1965, ente les sos creaciones destaca’l poemariu en castellanu ‘El peso de la luz’, col que ganó nel 2002 en Lanzarote’l XV Premio de Poesía Esperanza Spínola , creación que llueu tendría, nel 2005, una edición especial discu-llibru con música de Xulio Arbesú (Foro pola poesía del Valle del Nalón). Otros poemes suyos tán recoyíos en delles antoloxíes, tamién en castellanu, y tamién inclúi ún de los sos poemes en ‘Patrimoniu intelectual’, trabayu asoleyáu nel 2008 nel que se recueyen obres de dellos poetes de Samartín del Rei Aurelio. D’igual forma, hai que destacar la presencia d’un poema suyu, musicalizáu tamién por Arbesú, nel discu-llibru ‘La mina que nun cierra’, una seleición de testos d’autores del valle del Nalón.