"Sube la Marea" ye'l nuevu trabayu de Dixebra

"Sube la marea" ye como se titula'l sestu discu de Dixebra,
banda asturiana de rock que muestren con él un cambiu d'estilu tanto
nes lletres como na música.

Anque esti cambiu nun ye traumáticu, nin muncho menos, ye un pasu
natural na evolución d'esti grupu, que pue dicise qu'entamo col
"Dieron en Duru" de 1997. Les canciones d'esti trabayu tan chiscaes
de dellos tipos de música, que van dende'l Hip Hop, el reage, o el pop,
anque siguen tando mui presentes la esencia del grupu col rock y el ska. Esti
soníu ye frutu de delles coses, ente elles, los gustos de los sos
componentes, que col pasu los años van recibiendo influencies de muncho
tipos de música, lo qu'acaba notándose na música qu'ellos
mesmos faen, tamién la inclusión de nuevos miembros na banda,
como son los metales d'Agus (trompeta) y Eladio (saxos), y sobre too, la
produción d'un veteranu de la música, el vascu Kaki Arkarazo.

Precisamente'l discu grabóse nel d'Abril d'esti añu nos
estudios "Garate" cola produción del mentáu Kaki
Arkarazo, antiguu guitarrista de la banda Negu Gorriak, y qu'agora ta
dedicáu al llabor de productor. Les lletres del discu son tres de Quique
Faes, otres dos de Xandru Fernández, otres dos d'Ildefonso
Vázquez y Noemí Estrada respectivamente, y el restu de los propios
componentes del grupu, nes que falen de la realidá social tanto
d'Asturies como d'otros sitios del mundu.

Nel discu nun tuvieron munches collaboraciones, pero si tan Evaristo,
cantante del grupu "La Polla Records", que puxo la voz nel corte
númberu dos "Dime como ye", y el bouzouki de Rubén Bada
de "Ú?", nel cantar "Vientu na cara".

Un grupu clásicu de la música asturiana, y un discu qu'a
bon seguru se convertirá n'otru clásicu. Esti discu ya
podéis mercalu na nuestra tienda nesta direción.