SUATEA y el Sindicatu d'Estudiantes faen un llamáu a la fuelga na enseñanza esti miércoles

El sindicatu d'enseñanza SUATEA y la organización estudiantil Sindicatu d'Estudiantes (SE) asoleyaron un comunicáu conxuntu en que llamen "a la Comunidá Educativa" a participar nes movilizaciones que tan desarrollándose esta selmana contra la Llei Orgánica d'Enseñanza con especial atención a la fuelga convocada pa mañana miércoles 14, viéspora de la votación de la Llei en Congresu de los Diputaos. Amás del paru nos centros educativos, les organizaciones convocantes llamen a concentraciones esi miércoles a les 12 de la mañana na Plaza l'Umedal de Xixón, la Plaza d'España n'Uviéu y énte la Casa Conceyu d'Avilés, rematando la protesta pela tarde nuna manifestación que va salir a les 6 de la estación de RENFE de la capital asturiana.

Les organizaciones afirmen que los remociques que fexo la comisión d'Educación del Congresu al testu orixinal de la LLei Orgánica d'Educación supunxeron un empeoramientu del mesmu y una "cesión a les organizaciones de la derecha educativa y de los partíos que les sofiten" en palabres de los convocantes del paru, "lo más grave d'estes modificaciones refierse a la inxente cantidá de dineru públicu que va empobinase a subvencionar empreses privaes". SUATEA y SE afirmen nesti sentíu que nos Presupuestos Xenerales del Estáu amestóse una xuba del 3,1 % pa gastos de la escuela concertada, mientres que na rede pública namás se contempla una xuba porcentual de 2 puntos.

Otres de les quexes de les organizaciones convocantes céntrense nel conceptu de llibertá d'elección de centru, que pa SUATEA y SE escuende'l derechu de los centros particulares concertaos a esbillar los alumnos qu'almiten, colo que "la segregación social ta garantizada". No tocante a la dimensión más asturiana de la LOE, llámase l'atención sobre'l fechu de que'l testu de la llei obliga a les comunidaes autónomes a concertar tramos non obligatorios como la etapa de 3 a 6 años, dalgo que los convocantes del paru dicen que va tener consecuencies bien gafes pa los trabayadores de la enseñanza pública n'Asturies.

La convocatoria de fuelga preséntase tamién contra'l caltenimientu, esmucíos nel testu de la llei reformada, d'aspectos de l'antigua Llei de Calidá d'Enseñanza del gobiernu del PP, ente ellos los itinerarios, que dexen que s'espulse a un estudiante del sistema educativu con 15 años, l'endurecimientu del accesu a la universidá o la masificación nes clases, consintiendo con una xuba del 10% del númberu d'estudiantes per clas.