SUATEA va reclamar que se regule l’usu del idioma nel Conseyu Escolar o la Xunta de Personal Docente

|
Logu del Consejo Escolar del Principado de Asturias con fondu blancu

El Conseyu Escolar de Principáu d’Asturies (CEPA) vivió’l xueves pasáu, mesmu día nel que se conocía la direición de la sentencia del Tribunal Constitucional, un episodiu nuevu d’ataque al usu del asturianu tres la presentación por parte de SUATEA d'un escritu en llingua asturiana. El sindicatu educativu va reclamar que se regulé l’emplegu del idioma en tolos órganos colexaos nos que participa.

Nesa xornada, la Confederación Católica Nacional de Padres de Familia y Padres de Alumnos (CONCAPA) amosó la so disconformidá por dichu testu al “recibilu esclusivamente nuna llingua que nun ye'l castellán, llingua oficial y vehicular del nuestru país”, esplica’l Sindicatu Unitariu Autonómu de Trabayadores de la Enseñanza d’Asturies (SUATEA) qu’argumentó. L’escritu aceptóse, pero “el presidente de Conseyu Escolar –José Ramón Álvarez Bello– fizo comentarios poco agraciaos referíos al escritu, calificando'l fechu de ser presentáu n'asturianu como una forma d'imposición”, añade.

“Quiso l'azar” que, hores depués, se conociera la direición de la sentencia del Constitucional sobre'l recursu d'inconstitucionalidá plantegáu por VOX contra'l Reglamentu de la Xunta Xeneral, que “reconoz la plena constitucionalidá de la norma y, polo tanto, el derechu a emplagar l'asturianu nes nuestres instituciones”. El llunes, nel Plenu siguiente del CEPA, SUATEA sacó otra vuelta l’asuntu, aprovechando pa esclariar “que nun se pue considerar imposición l'exerciciu d'un derechu”.

Dada la situación, col envís de “reforzar los nuestros derechos llingüísticos, d'avanzar na normalización institucional de les nuestres llingües y torgar enquívocos”, SUATEA va dar el pasu de reclamar “que nos reglamentos de tolos órganos colexaos nos que participamos (conseyos escolares, Xunta de Personal Docente, Comités de Salú y Seguridá Llaboral...) se reconoza esplícitamente'l derechu de cualisquier persona al usu del asturianu o'l gallego-asturianu”.

Contador Estadistiques