SUATEA va pidir el derechu al “añu sabáticu” pa los maestros

El reconocimientu del derechu al esfrute d'un añu de descansu por cada cuatro trabayaos ente la plantiya docente va ser una de les reivindicaciones que va intentar llevar alantre'l sindicatu SUATEA nel marcu de les actuales negociaciones cola alministración. Según esplica la central sindical d'enseñanza asturiana, esta midida, que yá funciona en delles comunidaes autónomes, diba favorecer la conciliación ente la vida personal y la llaboral, la dedicación al estudiu y la formación por parte del profesoráu y tamién diba ayudar a menguar les enfermedaes profesionales como l'estrés y l'ansiedá, meyorando les rellaciones profesionales y la calidá de la enseñanza en xeneral. Pa financiar la midida, SUATEA propón que se faigan retenciones nel sueldu de los docentes a lo llargo de los 4 años de trabayu con vistes a pagar el quintu añu en que se descansaría.

El sindicatu encóntase na existencia del "Plan Concilia" del Gobiernu español como una razón de más pa empobinar esti tipu de midíes y afirma que la Conseyería nun tien escuses pa retrasar la negociación sobre esti particular y sobre otros puntos que demanda, como ye'l casu de l'Ampliación de los estremaos permisos de maternidá y por familiares a cargu,amás d'un sistema de permutes temporales.