SUATEA reclama una RTPA “de calidá” y defende’l so papel pa la normalización del asturianu

El sindicatu educativu SUATEA asoleyó un comunicáu nel que reclama una RTPA “de calidá, bien xestionada y al serviciu de les necesidaes de la sociedá”. D’igual forma, defende’l papel que tien pa la normalización de la llingua asturiana.
 
“Les noticies y acontecimientos que tán ocurriendo nes últimes selmanes alrodiu de la RTPA y los y les trabayadores nun mos pueden dexar al marxe. Dende SUATEA defendemos la esistencia d'una RTPA de calidá, bien xestionada y al serviciu de les necesidaes de la sociedá y non d'intereses partidistes, del Gobiernu de turnu o d'empresarios especuladores por munches razones”, anicia’l Sindicatu Unitariu y Autónomu de Trabayadores de la Enseñanza n’Asturies. Asina, fai referencia al “importante valor cultural y educativu” del ente públicu de comunicación, yá que “xuega un papel mui importante nel fomentu y normalización de la llingua y cultura asturianes”. Nesti aspeutu, tamién demanda “una programación infantil y xuvenil de calidá que mos permita aprovechar l'importante potencial pedagóxicu que tienen los medios de comunicación”.
 
Na nota, SUATEA fai referencia “al importante llabor social, al igual que la educación pública, que xuega na tresmisión de valores”, yá que’l “desarrollu d’una democracia real ye inherente a la esistencia y bon funcionamientu d'unos servicios públicos de comunicación de calidá. D'unos medios de comunicación que fomenten el sentíu críticu de les persones y la formación nunos valores que contribúin al desendolque d'una sociedá más xusta”. Por último, señala tamién el “importante valor económicu y llaboral” del ente públicu: “El zarru de la RTPA supón mandar a muncha xente a la cai y obligar a emigrar a otra tanta que, anguaño, enllena les aules” de centros formativos audiovisuales n’Asturies.
 
“Por too ello, esiximos l'anulación del recorte, apuntando al Parllamentu como única vía de solución del conflictu y d'establecimientu d'una verdadera RTPA al serviciu de la sociedá y fuera de prautiques ‘chanchulleres’ y clientelares que mos recuerden a époques anteriores. Mostramos la nuestra solidaridá y apoyu a tolos trabayadores d'esti ente públicu y denunciamos el tratamientu que se ta faciendo d'ellos como ‘daños colaterales d'una guerra ente dos exércitos inmersos nuna llucha polos sos intereses’”, señalen dende SUATEA, que llama a la participación nes movilizaciones que tán faciendo los trabayadores de la RTPA.