SUATEA reclama meyores midíes contra la esplotación sexual

Esti 23 de setiembre celébrase’l “Día Internacional Contra la Esplotación Sexual”. Poro, SUATEA llama a erradicar la esplotación sexual, protexer a les sos víctimes y educar n’igualdá nun Estáu nel que pue haber 500.000 prostitutes.

Nesti Día Internacional Contra la Esplotación Sexual, la Secretaría de Muyer de SUATEA llama a replantear el “Plan Integral de Llucha contra la Trata de Seres Humanos con Fines d’Esplotación Sexual”, una midía del Gobiernu español que, de los cálculos d’ente 350.000 y 500.000 prostitutes esistentes en too l’Estáu, namás que reconoz a 858 persones como víctimes d’esplotación sexual.

“Fai falta voluntá política pa erradicar la esplotación sexual, son necesarios los recursos pa dar asistencia y protección integral a les víctimes, pal so arreglu y reinserción social” reclama SUATEA, que defende qu’estos recuersos “tendríen que salir de la confiscación de los bienes de los criminales de les mafies”.

Tamién critica’l sindicatu asturianu que les administraciones públiques se centraren “na persecución de les persones indocumentaes” y consideren que “nun se pue dar el tratamientu d’inmigración illegal a les muyeres víctimes de la trata pa la so explotación sexual”.

Educar contra la prostitución
SUATEA tamién llama a educar n’igualdá pa que “dexe d’esistir” un porcentaxe de clientes de prostitución que, nel Estáu español, asítiase ente’l 6 y el 30% de la población. “D’otra forma, siguiremos siendo cómplices d’estos atentaos contra los derechos humanos”, sentencien.