SUATEA llama a la defensa de l’asturianidá del Navia - Eo "contra les inxerencies gallegues"

Nun comunicáu de prensa asoleyáu esta mañana, la organización sindical d'enseñanza SUATEA denuncia "la inxerencia de les instituciones, organizaciones y partíos políticos de Galicia n´asuntos que competen únicamente a Asturies". Fontes del sindicatu comentaron a Asturies.com que'l sindicatu decidió facer públicu'l so pronunciamientu contra les pretensiones gallegues y a favor de l'asturianidá del Navia - Eo dempués de falar con profesores de la zona esmolecíos poles noticies que llegaben de la otra parte de la Ría del Eo.

La organización sindical acusa a instituciones y entidaes de Galicia de "llevar tiempu con estes inxerencies" y fai un resume de les intervenciones gallegues sobre Asturies nel que sorraya como puntos de mayor gravedá'l nomamientu d'un académicu de la llingua gallega "como representante de lo qu'ellos llamen gallego de Asturias" y la presentación de la candidatura del patrimoniu inmaterial gallego-portugués énte la UNESCO na que se referenciaba'l Navia-Eo como parte d'esti patrimoniu.


SUATEA denuncia como ún pasu más d'estes inxerencies el que "agora los gallegos yá pretenden la anexión de toos estos territorios" en referencia a la propuesta de reforma estatutaria de Galicia que defende'l Bloque Nacionalista Gallegu y que defende la entrada de conceyos d'otres autonomíes en Galicia. Por too ello, el sindicatu exixe una "rempuesta contundente del Gobiernu Asturianu".