SUATEA gana les elecciones sindicales

SUATEA ganó’l pasáu vienres les elecciones sindicales na enseñanza pública asturiana. El sindicatu reafirmó la so "coherencia y compromisu" y dixo que “ye importante dar confianza a un sindicalismu de llucha y de resistencia”.

SUATEA ganó’l pasáu vienres les elecciones sindicales na enseñanza pública asturiana. El sindicatu reafirmó la so "coherencia y compromisu" y dixo que “ye importante dar confianza a un sindicalismu de llucha y de resistencia”.
Con un 25’24% de los votos SUATEA ganó les elecciones sindicales, algamando 11 delegaos. La participación total foi d’un 47,33% y los demás sindicatos con representación fueron ANPE  (11 delegaos), UXT (10), CC.OO (8) y CSIF (3).

“Nestos momentos nos que los ataques contra los servicios públicos medren, los intentos d’introducir la xestión empresarial na escuela pública y la reducción salarial son moneda corriente, ye más importante dar confianza a un sindicalismu de llucha y resistencia como SUATEA”, señala’l sindicatu asturianu.

Dempués d’agradecer l’apoyu al profesoráu, SUATEA fizo un llamamiento a toles fuerces sindicales pa trabayar unides “na defensa de les condiciones llaborales de los docentes de la escuela pública” y a evitar “caer nes trampes que l’alministración estatal y autonómica tienden”.

Asignatures pendientes
Per otru llau, el sindicatu d’enseñaza señaló qu’hai munches “asignatures pendientes” cola alministración. La vuelta de les competencies a la conseyería d’educación, estabilidá hasta l’accesu definitivu a la función docente pal colectivu interinu, xubilaciones y reducción horaria, son dalgunes d’elles.

SUATEA sentenció la so valoración de los resultaos electorales sorrayando que “les afirmaciones del Conseyeru d’Educación y los planes de los gobiernos estatal y asturianu en materia de recortes educativos son refugables dafechu, pues nagüen por facer pagar a la enseñanza pública los costes de la crisis”.