SUATEA entama una campaña pol asturianu n’Educación Infantil

SUATEA denuncia otra vuelta la negación “sistemática” de la conseyería d’Educación a que l’alumnáu d’Educación Infantil puea recibir clases n’asturianu o gallego-asturiano. Por eso entamen una campaña d’unvíu d’instancies.

El sindicatu asturianu d’enseñanza denuncia que la conseyería d’Educación, al traviés del Serviu d’Inspección ta vulnerando l’artículu 10 de la llei d’usu y promoción. Sorrayen qu’estes instituciones tienen amás “conocimientu de causa” tres de la entrevista que representantes sindicales caltuvieron con ellos a finales del cursu pasáu.

“Nengún centru onde nunca s’impartió Llingua n’Educación Infantil y solicitó esti cursu ufiertales o onde padres solicitaron que los sos fíos recibieren clases con estos conteníos, foi atendíu per parte de la Conseyería Educación”, denunció SUATEA.

D’esti mou, el sindicatu asturianu, xunto a delles madres y padres, van presentar instancies empobinaes a la conseyería d’Educación pa denunciar la situación, desixir “l’atención del alumnáu” y pidir explicaciones pa la “desatención” a los derechos de los asturfalantes.

SUATEA llama tamién a la participación de la sociedá, d’esti mou ufren en descarga na so páxina web les instacies “col envís de potenciar esta campaña”. Les persones que les cubren han d’unviales al sindicatu personalmente o per corréu ordinariu.

Vía contenciosa
“Esta reacción ye pa entamar la reclamación vía administrativa, qu’empatará na vía contenciosa de nun ser atendíes les nuestres reclamaciones”, alvierte’l sindicatu asturianu, presentando la posibilidá de llevar a la conseyería a xuiciu por mor del incumplimientu de la llei.