SUATEA denuncia que 14 centros nun cuenten con maestru d’asturianu

“Una escandalosa falta de previsión de la Conseyería d’Educación” provoca que los alumnos de 14 centros nun tengan tovía maestru d’asturianu, alerta SUATEA. El sindicatu reclama l’apertura de les bolses d’aspirantes a interinidá.

En total, son 12 les escueles de Primaria que nun tienen docente de Llingua Asturiana y dos, de Gallego-asturiano, toes elles de zones rurales de les ales d’Asturies; places que tienen la carauterístiques común de ser a media xornada y itinerantes. Pal Sindicatu Unitariu y Autónomu de Trabayadores de la Enseñanza d’Asturies (SUATEA) esta situación dase por “una escandalosa falta de previsión de la Conseyería d’Educación” y ye una amuesa más de “la precariedá nes condiciones llaborales del profesoráu, con nefastes consecuencies pa la calidá de la enseñanza y pal desarrollu d’estes árees nos centros”.

“Tolos años vemos como la desidia y la falta d’interés por normalizar, recuperar y promocionar la llingua propia provoca un deterioru que sedrá revesosu d’iguar nun futuru inmediatu. Nun se cumple la Llei d’Usu y Promoción nin se faen realidá promeses como la criación de la especialidá prometida en delles ocasiones pola conseyera d’Educación”, critiquen denden SUATEA, que considera “fundamental” nun procesu de recuperación llingüística “estabilizar l’asignatura nel sistema educativu y qu’algame l’estatus qu’el restu d’árees tienen”. El sindicatu reclama a la Conseyería d’Educación, Cultura y Deporte “l’apertura inmediata de les bolses d’aspirantes a interinidá” pa salvar la situación actual, ensin escaecer la creación de la especialidá docente prometida por Ana González pa esta llexislatura y la oficialidá del idioma.