SUATEA denuncia los”gravísimos ataques” del conseyeru d’educación contra l’asignatura d’asturianu

El sindicatu d'enseñanza SUATEA emitió ayeri un durísimu comunicáu en que denuncia lo que califica de "Gravísimu ataque" del conseyeru d'Educación José Luis Iglesias Riopedre, a l'asignatura de llingua asturiana. En declaraciones al diariu de Xixón "El Comercio" feches dempués del encierru de maestros d'asturianu qu'esixíen l'apertura de negociaciones por parte de la conseyería sobre l'asignatura de llingua, el titular d'educación afirmaba que "el 85% de los padres y madres d'Asturies son contrarios a la obligatoriedá de l'asignatura de llingua asturiana" una afirmación que dende esta formación sindical afirma que "nun podemos xustificar dende nengún puntu de vista".

Pa SUATEA les declaraciones de Riopedre espeyen como se ve, a poco de les elecciones, y dempués de que comunicara que nun diba a repitir en cargu, la "asturianofobia" de Riopedre

SUATEA sorraya como, acordies a la situación llegal del asturianu "ye imposible que l'asignatura sía obligatoria" desque "nun hai reconocimientu na equiparación de derechos col castellanu" en referncia a la la oficialidá. SUATEA entiende que Riopedre "manipula la información dando una visión partidista y sectaria de la realidá" al empar qu'apurre "datos falsos". SUATEA ve un "ataque intencionáu" consistente en "falar d'obligatoriedaes pa condicionar a la xente con esti términu".La organización esixe "l'apertura urxente y inmediata de negociaciones" sobre l'ordenamientu curricular de l'asignatura y la estabilidá del profesoráu.