SUATEA demanda a los partíos "un compromisu cola escuela pública"

Dada la cercanía de la xornada d'eleiciones estatales, que va celebrase esti domingu, SUATEA aprovecha pa demandar a los partíos políticos "un compromisu cola escuela pública". Señala que ye la única forma de garantizar la educación a tola ciudadanía.

"En SUATEA sabemos que la única rede de centros d’enseñu que garantiza’l derechu a la educación de tola ciudadanía ensin distinción de creos, races, llugar de nacimientu o condición económica ye la pública. Ye por ello polo que pidimos a tolos partíos que se presenten a estes eleiciones que la defendan y, dao qu’ella sola pue atender les necesidaes educatives de tola población nes meyores condiciones, se dexe de sovencionar con conciertos a les empreses privaes", espresa'l sindicatu educativu nun comunicáu.

En referencia a unes pallabres de la candidata popular Susana López Ares de defensa de la concertada, SUATEA apunta que "el derechu de los pas y mas a elixir centru nun pue ser un criteriu absolutu y tar percima de la necesidá de planificación educativa. Esi 'derechu' de llibre eleición exércese nes fasteres  urbanes onde los que negocien cola educación (mayoritariamente escueles concertaes de la Ilesia Católica) tán presentes, tienen demanda y esta da ganancies ideolóxiques y económiques. Los pas y mas de les fasteres rurales nun tienen opción d’elixir y son solo atendíos pola única rede que garantiza el so derechu a la educación: la pública".

"Mientres, la pública sufre tolos años grandes axustes que se xustifiquen pola falsa 'crisis económica', 'racionalización del gastu', 'la baxada de natalidá', 'la sacrosanta  eficiencia',  la renovación de los conciertos realízase cada cuatro años depués d’axustar duramente la Pública", recuerda SUATEA.

Educación Infantil

Nel comunicáu tamién fai referencia a unes declaraciones del socialista Vicente Álvarez Areces sobre'l recorte d'aules na etapa d'Educación Infantil . El sindicatu señala al respeuto que "la baxada la natalidá del alumnáu d’esta etapa  tien d’aprovechase como una oportunidá pa meyorar la calidá de la educaciónde los rapacinos/es", pa lo que proponen les midíes siguientes: merma de les ratios d’alumnáu per aula, cubrir toles necesidaes d’apoyu con profesoráu y reducción de les hores llectives del profesoráu, permitiendo asina organizar meyor la so llabor docente y preparación de materiales didáuticos.