SUATEA asegura que la situación del asturianu nel enseñu non sólo nun avanza, “sinón que recula”

|
Campaña matriculación #YoApúntome modificada por SUATEA

Cerca d’enfocar el tramu final de la llexislatura, SUATEA fai balance de la situación del asturianu y el gallego-asturiano nel enseñu. “Non sólo lleva estos trés años estancada, sinón que recula y nun se respeten los derechos de la ciudadanía”, asegura’l sindicatu.

Nin la presencia de Genaro Alonso al frente de la Conseyería d’Educación y Cultura, “en teoría enforma favoratible a avanzar nes politiques llingüístiques y comprometíu col so desarrollu, como munches veces declaró en públicu, ‘dientro’l marcu normativu actual’, esto ye l’Estatutu Autonomía d’Asturies y la Llei d’Usu de y Promoción del Bable/Asturianu de 1998”, nin l’alcuerdu d’investidura ente la FSA y IX provocaron avance na situación de los idiomes nel enseñu, según indica’l Sindicatu Unitariu Autónomu de los Trabayadores de la Enseñanza d’Asturies (SUATEA). Ente los exemplos que pon p’avalar dicha información destaca la situación d’inestabilidá na que ta tol profesoráu de Llingua Asturiana y Gallego-asturiano dende hai 25 años, ensin solución nenguna por parte de tolos partíos gobernantes, y que se caltién pal cursu viniente: “Pasales a plantiya orgánica –les places– ye competencia d’esti Gobiernu. Pa cubriles con personal funcionario de carrera ye menester crear la especialidá y pa ello ún de los caminos ye oficializar los nuestros idiomes” demanda.

A ello hai que sumar que “los puestos a tiempu completu baxen en 22 places y los de media xornada aumenten en 34 en comparanza colos datos del cursu pasáu”, demostrando que “desapaecen puestos completos, tresformándose parcialmente en medies xornaes y dando llugar, poro, a desaniciu y precarización del emplegu del profesoráu d’esta especialidá, más si se tien en cuenta que munchos son itinerantes”. En Secundaria’l recorte ye inda mayor al pasar de 17 places a xornada completa a 7.

SUATEA recuerda nesti puntu que “la merma de puestos nun se debe a una merma de la demanda, sinón a la política prioritaria de recorte presupuestariu saltando perriba de los derechos de la ciudadanía”, asegura. Al respeuto rellata como “en delles escueles d’Educación Infantil y Primaria onde les direcciones reclamaron el caltenimientu del puestu a tiempu completu pa poder atender a tol alumnáu, nun se-yos fizo casu a la demanda” o como en Secundaria la planificación de la conseyería lleva a esviar al alumnáu qu’escueye asturianu a otres optatives.

Ausencia nes escueles oficiales d’idiomes o nel Conservatoriu

La vulneración de derechos de les asturianes y asturianos depués de la vixencia dende hai dos décade de la Llei d’Usu y Promoción del Bable tamién se da nes escueles oficiales d’Iidomes, dellos de ciclos de FP, Arte Drámaticu o la especialidá de Gaita dientro’l Conservatoriu Superior de Música, onde nun s’inclúi l’asturianu nos sos currículos –hai poco aprobaos– o planes d’estudiu “magar que SUATEA presentó nel Conseyu Escolar d’Asturies emmiendes pa que lu recoyeren”. Tres esponer esta situación, el sindicatu esixe “a esta Alministración educativa, y especialmente al conseyeru d’Educación y al director xeneral de Planificación Llingüística, qu’actúen pa reconducir esta situación y atiendan les xustes demandes que-yos plantegamos les persones, les direcciones de los centros, les organizaciones sindicales y la ciudadanía na cai”.

Na semeya, cartelu modificáu por SUATEA de la campaña de promoción de la matriculación na materia de Llingua Asturiana entamada pola conseyería.

Contador Estadistiques