SUATEA alerta d’irregularidaes “graves” na escolarización n’asturianu y fala

|

El sindicatu educativu esixe a la Conseyería d'Educación “un cambiu urxente y radical en política llingüística”. Denuncia’l desaniciu de les dos llingües na Educación Infantil y el consentimientu de ratios de 30 alumnos per aula en Primaria, ente otres cuestiones.

“El conseyeru d’Educación y Cultura, Genaro Alonso, nes sos comparecencies públiques y nos conceyos realizaos a primeros de cursu con  tolos sindicatos presentes na Xunta de Personal Docente, comprometióse a ameyorar el desarrollu de la Llei d’Usu y Promoción del Asturianu y el so reforzamientu nel ámbitu educativu. De la mesma manera, el direutor xeneral de Planificación Llingüística mostróse comprometíu con estos principios y con dar solución a les reclamaciones que se-y treslladaron sobre tola riestra d’irregularidaes detectaes a los primero del cursu”, esplica’l Sindicatu Unitariu Autónomu de Trabayadores de la Enseñanza d’Asturies (SUATEA), que llamenta que “estes intenciones y  declaraciones concrétense na realidá nuna política continuista cola de gobiernos anteriores del PSOE y que consiste nel desaniciu de la enseñanza del asturianu y del gallego-asturiano na Educación Infantil, la falta de siguimientu por parte de la inspección educativa d’irregularidaes na ufierta de l’asignatura en Secundaria, la non cobertura de baxes de gallego-asturiano dende hai más d’un mes nes escueles de Tapia y la illegalidá de la xuntanza de grupos con ratios d’alumnáu de más de 25 alumnos en Primaria”.

Ún de los casos espuestos pol sindicatu educativu ye’l de les Escueles Llerón-Clarín y Aniceto Sela de Mieres, “onde l’alumnáu d’Educación Infantil venía recibiendo clases d’asturianu dende hai cuantayá –el Llerón-Clarín yá foi centru pilotu na implantación de l’asignatura d’asturianu nel añu 1984– y esti cursu tovía nun les reciben” pese a les reclamaciones de SUATEA y de la comunidá educativa. La solución ta en que s’amplie’l contratu del profesor d’asturianu a xornada completa pa poder siguir impartiendo esta asignatura nel centru.

Clases masificaes

“Sangrante y illegal” ye tamién el casu del Colexu La Vallina de Lluanco, “onde un profesor d’asturianu, contratáu a media xornada, imparte clases nun grupu de primeru y otru de terceru de Primaria con 30 alumnos y alumnes, consecuencia de la xuntanza de dos del mesmu nivel”, dalgo que tamién pasa “con otru grupu de sestu con 28 alumnos”. La llexislación afita en 25 la ratio máxima pa grupos de Primaria y la direición del centru y SUATEA vienen dende hai tiempu solicitando l’ampliación a xornada completa del maestru “pa poder desdoblar estos grupos y atender, cola calidá a la que tien derechu, a esti alumnáu”, ensin ésitu.

“En viendo la inaición nidia de la Conseyería d’Educación y Cultura, del Serviciu de Planificación Llingüística y del Gobiernu del PSOE énte estos fechos acontecíos al entamu del supuestu camín de la ‘Normalización Llingüística’ nel ámbitu educativu, nun mos queda otra que pidir un cambiu de rumbu de 180 graos si se quier cumplir col mandáu de la Xunta Xeneral del Principáu y colos derechos llingüísticos del alumnáu”, esixe SUATEA en referencia al Plan de dignificación de la llingua asturiana aprobáu na Cámara asturiana col apoyu del PSOE, Podemos, IX y Foro, pendiente tovía de que’l Conseyu de Gobiernu faiga la so redaición definitiva.

Comentarios

Dixe-lo nun fai muncho, cuandu nomaron a esti paisanu ensin conocelu, mientres seya'l PSOE nun hai na que facer,Oficialida Ya.

Contador Estadistiques