SUATEA afirma que'l pautu ente Wert y González “empeora” la situación del asturianu na educación

L’alcuerdu ente’l ministru Wert y Ana González, anunciáu pola conseyera, “empeora” la situación del asturianu na educación, afirma SUATEA. En Primaria la materia pasaría a competir con Educación Artística y la segunda llingua estranxera.

El Sindicatu Unitariu y Autónomu de Trabayadores de la Enseñanza d’Asturies (SUATEA) entiende que les declaraciones de la conseyera “son l’amuesa d’un despreciu absolutu pol valir d’esti padremuñu llingüísticu, yá que se valora como un éxitu lo que supón un retrocesu importante de la presencia de l'asignatura nel currículu”. La situación actual, “yá de por sí precaria abondo”, suponía na enseñanza Primaria la obligatoriedá d'ufiertar Llingua Asturiana y Gallego-asturiana “cumpliendo la voluntariedá a la qu’obliga la Llei d’Usu, ensin que por ello tuviera que competir con nenguna otra asignatura. Si'l cambiu supón poner l’asturianu nuna competición pa ver cuála ye la más guapa, ¿ónde queda la ‘promoción de la llingua’?”.

“En casu de dase esti alcuerdu col ministeriu afitaríase una situación que marxina a una llingua que nun algamó l'estatus de la oficialidá. Contarán quiciabes que ye una manera de desfacese poco a poco d'esti ‘problema’ ensin manchase les manes. Dende esti sindicatu queremos denunciar la responsabilidá de l'alministración asturiana, qu'apuesta por un procesu que busca la desapaición del asturianu a mediu plazu aprovechando una coxuntura na que se quier imponer una política educativa reaccionaria, que favorez a los sectores de la derecha recalcitrante en perxuiciu d'un derechu básicu de la ciudadanía. Nun val denunciar la LOMCE y la falta d'actitú negociadora y emponderar per otru llau l'actitú positiva del ministru Wert cuando'l resultáu ye un rebaxe del actual estatus del asturianu”, apunta SUATEA nun comunicáu nel que demanda la declaración d’oficialidá del idioma, “salida digna única pa la Llingua Asturiana”.

Faustino Zapico, miembru de la secretaría del sindicatu, señaló en declaraciones a Asturies.com que l’alcuerdu col ministru anunciáu pola conseyera ye “una barbaridá” y dexa nuna situación más precaria tovía a los profesores de Llingua Asturiana y Gallego-Asturiana, na so inmensa mayoría interinos. “Cuando lleguen a los centros, los otros profesores van velos como competidores al pasar l’asignatura de ser voluntaria a optativa”, esplica’l docente, que cree que con esta propuesta’l Gobiernu asturianu “busca matar adulces la llingua asturiana”.

Caltiénense les movilizaciones

El profesoráu de Llingua Asturiana y Gallego-asturiano va continuar coles movilizaciones previstes dada la situación mala cola que quedaría l’asignatura col alcuerdu ente’l Gobiernu estatal y nacional. Asina, los maestros yá tán trabayando colos sos alumnos y alumnes na redaición de cartes manifestando'l so apoyu al asturianu y pidiendo poder siguir exerciendu'l derechu a estudialu, que s’entregarán el 31 de xineru, a les 17.30 hores, nel Rexistru Xeneral d’Asturies, y treslladando a los centros escolares la propuesta de resolución que se pretende qu’aprueben los claustros. Nel s’encamienta al Gobiernu, a los grupos parllamentarios y a los responsables educativos “a poner les ferramientes llegales amañoses pa garantizar la presencia de la Llingua Asturiana y del Gallego-asturianu en toles etapes del sistema educativu y coles garantíes y condiciones de dignidá que-y correspuenden”.

Amás, yá ta abiertu na web ‘change.org’ el pidimientu ‘Nun permitas que l'asturianu desapaeza del sistema educativu’, cola declaración aprobada pol profesoráu de l’asignatura na asamblea del martes n’Uviéu, que suma 1.500 firmes en 24 hores.