Suari entrevista a García Arias na revista 'Cuadiernu' de La Ponte

El doctorandu n'Antropoloxía pola Universitat Rovira i Virgili fai "por recoyer el carís etnográficu y antropolóxicu" de la obra y pensamientu del ex presidente de l'ALLA.

El númberu 12 de 'Cuadiernu (Revista internacional de patrimonio, museología social, memoria y territorio)', qu'edita La Ponte Ecomuséu baxo la direición de Jesús Fernández Fernández, acueye ente les sos páxines una entrevista al filólogu Xosé Lluis García Arias, medaya d'Asturies 2023. El so autor ye Carlos Suari, con semeyes de Marcos Martínez.

"Una entrevista con forma de viaxe per un terrén milenta vegaes percorríu y analizáu pol propiu Arias. Ello ye: una comprensión máxima de la so, de la nuesa, realidá cultural. En pasáu, en presente y en futuru", adelanta l'autor, que rescampla que nella "faigo por recoyer el carís etnográficu y antropolóxicu que ye fácil descubri-y lleendo la so obra, al afondar nel so pensamientu".

"Fáigolo colos güeyos d'un antropólogu que nun acaba de ser: sollerte cuando ye quien a los matices, imaxinando les categoríes, reconociendo siempre la omnipresencia de la suxetividá, pero, como correspuende, lluchando contra'l sesgu. Esmigayando les coses pa, en poseyéndoles, contales o, como nesti casu, escuchales", espresa.

Un diálogu col que Suari tamién pretende "amosar respetu y almiración pol trabayu de García Arias". La entrevista ta disponible na rede y va poder consultase en papel nunes selmanes.