Suárez: “‘Faciendo país’ surde pol compromisu d’IX por afitar l’asturianismu na organización”

El Teatru Prendes de Candás foi’l llugar escoyíu pola estaya d’Izquierda Xunida (IX)  ‘Faciendo país’ pa presentase en sociedá. El so coordinador, Víctor Suárez, señaló que surde p’afitar el compromisu pa col asturianismu de la coalición.

Nel actu tamién tuvo presente’l coordinador d’IX, Manuel González Orviz, y Arancha Prado, responsable del Serviciu de Normalización Llingüística del Cabu Peñes, amás de Juan Iglesias Pola, coordinador d’IX de Carreño. El mesmu consistió nuna serie d’intervenciones y na proyeición de dos trabayos de Ramón Lluis Bande, ‘Estratexa’ y ‘Sangre’.

‘Faciendo país’ trátase d’una estaya que yá tuvo furrulando na década de los 90 y qu’agora se recupera col envís de “afitar l’asturianismu dientru de la organización”, esplica Suárez. “Foi una iniciativa de la Coordinadora de Programes y yo tómola como coordinador con munchu enfotu pa trabayar pol país”, continúa’l so responsable, que pretende que la estaya “sía un espeyu del trabayu que ta faciendo Izquierda Xunida pal asturianismu. Queremos potenciar lo que se fixo y trabayar por facer más coses”. El recibimientu por parte de les bases d’IX ta siendo “bonu” y “van apaeciendo militantes nuevos de les distintes agrupaciones”, según confirma Suárez, que se muestra “contentu” pola respuesta.

El trabayu de ‘Faciendo país’ va tar estos meses próximos daqué paráu por mor de les eleiciones europees, pero los sos miembros yá tienen en mente iniciatives de cara a la celebración del Día d’Asturies. “Pa eses feches esperamos tener una fueya de ruta zarrada con actos propios”, apuntó Suárez, que cuenta con que’l llabor de la estaya “sirva pa facer ver que n’Izquierda Xunida hai un güecu pa trabayar l’asturianismu, que somos varios los que tamos enfotaos nello, y que nun ye verdá qu’Izquierda Xunida nun se preocupe pola llingua y la cultura asturiana; ta trabayándose muncho, lo que pasa ye que ta tapecío y lo primero que tenemos son crítiques”.

Definición de país, les crítiques y Castrillón

Nuna charra con Asturies.com posterior al actu, González Orviz recordó una asamblea celebrada nos 90 na Feria de Muestres “nel qu’hubo un debate mui profundu sobre lo que yera la posición d’Izquierda Xunida –dende un puntu de vista non nacionalista, sinón federalista– sobre la definición d’Asturies, consensuando facelo como país”. El coordinador d’IX amosó la so satisfaición pola recuperación de la estaya “porque tán arramplando non sólo colos derechos sociales; tres d’ello tán llevando los derechos económicos, les llibertaes –metiéndonos mieu, con represión– y tamien los derechos culturales. Dicen que nesti momentu lo más importante ye la crisis económica, que ye verdá, pero con ello van llevándonoslo too. Equí tán tratando de dexanos l’esqueletu de la tramoya”.

Sobre les crítiques que recibe la organización dende sectores asturianistes, apunta que “l’asturianismu políticu, como la izquierda social que ta fuera de les instituciones, tienen n’Izquierda Xunida l’enemigu más proximu y yo digo que l’enemigu más próximu nun ye Izquierda Xunida. Nun pueden confundir l’adversariu políticu, si quieren, colo que ye l’enemigu de clase, que ta al otru llau, que ye’l que mete l’artículu 135 de la Constitución y cumple toles normes que vienen d’Europa, dictaes poles famoses cartes privaes de Trichet del Bancu Central Européu –que se pueden lleer mercando a la editorial Planeta, la de Lara, ési de La Sexta que se dedica agora a tomar posición política na izquierda dende la extrema derecha–. L’enemigu ta ellí, son los que, como dixo Víctor na so intervención, roben el dineru a la mayoría pa dalo a lo que más tienen, y pienso que l’asturianismu políticu ha de xuntar toles fuercies, como tenemos que facer colos movimientos sociales alternativos”, pese a “que ye difícil”. “La izquierda tenemos mui complicao alcanzar esa xuntura pol fechu de que nos xunen y separen les idees, mentes qu’a la derecha xune-yos l’interés y la economía”, añade.

Por último, entrugaos pol casu de Castrillón, nel que la conceyala de Cultura, María Esther García, nun puede utilizar l’asturianu nos Plenos al nun tener la funcionaria dominiu del idioma, Suárez apuntó que ye dalgo “no que se ta trabayando” y que se debe “a la falta d’oficialidá”, a lo que González Orviz puntualizó que “d’un problema alministrativu nun podemos facer un problema políticu”, pa depúes recordar como Castrillón foi’l segundu conceyu, tres Bimenes, que declaró la oficialidá nel so día, decisión que foi torgada darréu pol Tribunal Constitucional. “Necesitamos establecer mecanismos pa que cuando dalguien fale n’asturianu nun Plenu pueda recoyeses”, teniendo en cuenta que “tolos plenos tán agora grabaos” y que se pue facer usu del Serviciu de Normalización Llingüística, figura que precisamente Castrillón nun tien activa dende’l 1 de xineru. “Lo que se trata ye d’avanzar”, continuó, “facer como l’agua; métese nes fisures y una vez dientro yá ye difícil echate porque la humedá queda ehí”.

Na semeya, Iglesias Pola, Suárez y González Orviz.