Strasbourg condena al Estáu español a pagar 20.000 euros a Otegui

El Tribunal Européu de Derechos Humanos condenó al Estáu a indemnizar a Arnaldo Otegui con 20.000 euros por frayar el so derechu d’espresión. El ex voceru de Batasuna llamó nel 2003 “responsable de los torturadores” al rei d'España.
 
La frase esacta pola qu’Otegui foi condenáu a un añu de prisión foi: “¿Cómo ye posible que se fotografíen güei en Bilbao col rei d’España cuando’l rei d’España ye’l xefe supremu del Exércitu español, esto ye, el responsable de los torturadores y el que protexe la tortura y impón el so réxime monárquicu al nuesu pueblu por medio de la tortura y la violencia?”. Agora, tres llevar el so casu a Strasbourg, el políticu vascu va ser indemnizáu con 20.000 euros por daños morales, anque nun primer momentu él reclamaba 79.000 euros. Amás, el Estáu va tener que pagar 3.000 euros polos costes xudiciales.
 
El Tribunal asitiáu en Francia consideró la condena a Otegui, dictada pol Tribunal Supremu y, de siguío, avalada pol Tribunal Constitucional, que refugó'l recursu d'amparu presentáu pola defensa, de “desproporcionada”. Tamién fixo referencia a la “sobreproteición” que tienen les lleis españoles cola figura de Juan Carlos de Borbón.