Stormy Mondays atrévese col asturianu con ‘Dormi yá’

Ún de los grupos más conocíos fuera de les nueses llendes, Stormy Mondays, ta acabante de colgar na rede’l so primer cantar n’asturianu. Trátase d’una añada cola que la banda contribúi a la normalización del idioma.

 

Con más de 1.200 visites en trés díes dende que la banda anunciara la espublización del videu del cantar en Youtube, Stormy Mondays rompe una llanza a favor del asturianu. Según señala Jorge Otero na web de la única banda estatal que tocó en Woodstock (1999) y autora del cantar escoyíu nun concursu de la NASA pa despertar a los astronautas na misión última del ‘Endeavour’, la composición del so primer cantar en llingua asturiana “yera una asignatura que teníamos pendiente dende hai munchu tiempu, muncho enantes de que la melodía de ‘Folk Lullaby’ s’infiltrara na mio cabeza, procedente ensin dulda de les montañes asturianes. Güei, esi ‘Folk Lullaby’ tien otru idioma”.

 

El líder de Stormy Mondays esplica a los siguidores de tol planeta que l’asturianu ye “una llingua qu’esiste, ye real, ye viable; y tien falantes de toles edaes, que la sienten y la viven, aunque a los que somos d’Uviéu paézcanos imposible. Una llingua en peligru de desaniciu, a la qu’aportamos un humilde y minúsculu granín d’arena”. El videu del cantar, nel que collaboraron Ángel Miguel (guitarres Fender), Miguel Herrero (timpani), Héctor Braga (gaita, arpa, zanfona y arreglos de gaita), Valentín Benavente (gaita) y Arsenio Ruiz (percusión), ye espectacular y contién delles imáxenes cedíes pola NASA. ‘Dormi yá’ pue descargase de baldre de la rede.