Stoned Atmosphere presenten güei "Issue 4"

Issue 4, el proyectu nuevu del grupu que más ta dando que falar dientro de la escena del hip hop asturianu, preséntase en público esta tarde. Ello va ser a les siete de la tarde na sala "Parque del Piles" de Xixón, onde'l grupu va contar tamién cola collaboración en directo de Escuela de Odio, colos que remocicaron ún de lossos temes más conocíos, el "Patria sin sol". Xunta ellos va tar tamién el grupu "Lego My Ego" y, como nun podía ser d'otra manera, los mesmos Ceeris y Arma X, alma d'esta achapladora musical de lletres irrespetuoses por sistema que lo mesmo echen pela clas política dominante que pelos iconos de la cultura popular asturiana más de recién, con especial zuna por Melendi.

"Issue 3" el trabayu anterior de los Stoned Atmosphere fizo un total de 50.000 descargues n'Internet, y agora, con ISSUE 4, los miembros del grupu de la cuenca'l Nalón tán énte'l retu del so primer discu espublizáu por una casa discos. El cd sal a la cai siendo tamién l'estrenu de la casa discos "Three Points Records", que con Stoned Atmosphere van tener la so primer referencia con esti trabayu grabáu en casadel mesmu Ceeris. Nel momentu de grabase'l discu, el cantante de Stoned Atmosphere Arma X declarare a Asturies.com que se conocía una evolución na cuestión musical nesti discu, qu'incluye más instrumentos "y amás na voz podemos dicir qu'hai más cantao y menos rapeao". Fran diz tamién qu'esti Issue 4 "ye más intimista , más esperimental, anque de toes maneres esti discu facémoslu cola mesma intención, llibertá y espíritu con que gastabemos nes maquetes anteriores".

Pa dir faciéndose una idega de como puede sonar esti discu equí puede sentise un snippetdel mesmu na mítica web 4x4 hip hop, la mesma dende la que se dieron a conocer los sos trabayos anteriores.