Sporting y Uviéu retomen la competición cola Primera División na cabeza y públicu nos estadios

|
Balones Sporting y Uviéu

Los aficionaos del Sporting y l’Uviéu tornen esti domingu al so asientu n’El Molinón y nel Carlos Tartiere Nuevu. Echa a rodar el balón en Segunda cola polémica del alcuerdu de LaLiga col fondu d’inversión CVC, refugáu pol conxuntu azul, y la esperanza nos dos equipos asturianos d’ocupar puestos altos na tabla pa suañar cola Primera.

Llueu de raspiar la clasificación pa les eliminatories pol ascensu, finando sétimu a 2 puntos del Rayo, equipu que daría’l saltu de categoría, David Gallego afronta la so segunda temporada al frente del Sporting ensin el so xugador de más nivel, Manu García, cedíu al Alavés, pero con un equipu más compensáu. Vienen a reforciar l’equipu Christian Rivera (Las Palmas) –únicu en propiedá–, l’ucranianu Kravets (Leganés, última temporada cedíu nel Lech Poznan polacu), Berrocal (Sevilla, Mirandés), Fran Villalba (Birmingham City, UD Almería) y el panameñu José Luis Rodríguez ‘Puma’ (Alavés, Lugo).

Ente les baxes rescampla d’igual forma la de Javi Fuego, que se retiró depués de nun recibir ufierta de renovación magar la importancia que tuvo la campaña pasada nel equipu y el so lideralgu nel vestuariu. Tamién la de Carmona llueu de 9 años de roxiblancu, anque el balear nun contó cola confianza de Gallego.

El primer rival de los xixoneses va ser el Burgos CF (domingu 17 hores, El Molinón), equipu que torna a la categoría depués del descensu alministrativu de la 2001/2002 al nun convertise en Sociedá Anónima Deportiva (SAD). Con Michu como direutor deportivu y Saúl Berjón nel campu dieron el saltu de categoría, contando agora en plantía con otros ex xugadores del Uviéu como Alfonso Herrero y el cedíu Riki, y col ex sportinguista Claudio.

Costas y Bastón

Tamién repite temporada al frente del bancu Ziganda col Uviéu. La dolorosa falta d’Arnau na direición deportiva cubrióse cola incorporación de Rubén Reyes, que ta faciendo fichaxes que xuben el nivel de la plantía.

Ente ellos rescamplen la vuelta de Costas (Celta) y el fichaxe de Borja Bastón (Leganés). A ellos súmense el francés Pierre Cornud (Sabadell), l’eslovacu Jirka (Crvena Zvezda, la última temporada cedíu nel Mirandés), Dani Calvo (Elche), Tomeu Nadal (Albacete) y los cedíos Joni Montiel (Rayo) y el brasileñu Matheus (Orlando City).

Entovía falten dellos refuercios pa cubrir les numberoses baxes y zarrar la plantía, con Luismi como oxetivu principal. Ente los que marcharon son importantes les ausencies de Tejera (Cartagena), Nieto (UD Almería), Leschuk (Eibar), Edgar (Betis) y Nahuel (Tenerife).

El debut de los azules va tener llugar el domingu a les 19.30 hores col Lugo nel Tartiere. L’equipu gallegu caltién en plantía a los ex sportinguistes Canella y Xavi Torres, y incorporó al porteru Whalley y a los ex xugadores del Uviéu Joselu y Señé.

Los d'El Requexón nun firmen

L’entamu de la temporada vieno marcada col alcuerdu aprobáu ayeri n’Asamblea Xeneral de LaLiga, baxo’l nome de LaLiga Impulso, col fondu d’inversión británicu CVC. Ésti va inyeutar a LaLiga 2667,5 millones de euros a cambio d’un porcentaxe de los derechos audiovisuales per 50 años.

Llueu LaLiga va dar préstamos al 0 por cientu d’interés a los clubes pa emplegalos, sobre manera, n’inversiones venceyaes al desendolcu d’infraestructures y d’innovación teunológica, un total d’un 70 por cientu. Namái’l 15 por cientu va poder destinase a fichaxes, siendo’l 15 restante pa la reestructuración de la deuda financiera.

De los 41 clubes namái 4 refuguen el préstamu y votaron en contra: l’Athletic Club, el Barcelona, el Madrid y l’Uviéu. El club azul amuesa la so oposición al alcuerdu, sobre manera pola manera de facer el repartu, anque afirma que va estudiar la posibilidá de participar nel alcuerdu énte “la desventaya competitiva que supondría refugar los fondos correspondientes a la nuesa entidá”.

Según les cifres, non oficiales, que se tán manexando, l’Uviéu tendría derechu a unos 12 millones d’euros, mentes que’l Sporting recibiría al rodiu los 24. Equipos de la mesma categoría, como’l Leganés o l’Eibar, tendríen una disponibilidá de 72 o 65 millones, y pa clubes en graves problemes financieros, como’l Málaga CF, que llevaría 41, ye un auténticu salvavides.

Contador Estadistiques