Sporting y Uviéu enfréntense col oxetivu de frayar dinámiques

|
Sporting y Uviéu enfréntense col oxetivu de frayar dinámiques

El Molinón acueye esti sábadu’l segundu derbi de la temporada, el terceru siguíu que se xuega ensin públicu nes graes. Un partíu, poro, escafeináu al que lu salva lo muncho que se xueguen nesta ocasión los dos equipos sobre’l prau: el Sporting necesita tornar a sumar pa nun perder les posiciones d’eliminatoria d’ascensu y l’Uviéu, ganar confianza pa evitar metese en problemes.

Dos derrotes siguíes, col Mirandés (1-2) y el Tenerife (1-0), fixeron esvanecer los suaños llonxanos d’ascensu direutu de los xixoneses pola superioridá y regularidá que tán amosando Espanyol y Mallorca, col Almería como aspirante a aprovechar un resbalón de catalanes o baleares, pero los pinchazos de los persiguidores faen que caltengan intautes les sos aspiraciones de promoción: quintos con 56 puntos de ventaya colos sétimos, el Girona, con 49 –anque’l Mirandés podría llegar a los 50 de ganar el partíu que tien aplazáu–. David Gallego recuperar pal choque a Campuzano, Rosas y Gragera, lo que-y da más opciones, sobre manera na delantera, escasa d’efeutivos, pola vuelta del catalán.

José Ángel Ziganda convoca a tolos sos efeutivos, anque Viti y Javi Mier ensin entrenamientos nes sos piernes, y sorprendió cola llamada del xuvenil Cardero, qu’ocupa la plaza de Cueto. L’Uviéu aporta al derbi con duldes depués de la irregular trayeutoria de los meses últimes, con siete partíos acumulaos ensin conocer la victoria –la última foi’l 28 de febreru, cuando ganó al Zaragoza con tantu de cabeza de Rodri–, anque entovía con un colchón colos puestos de peligru: son decimoquintos con 40 puntos y con 5 de ventaya col Cartagena, decimonovenu.

El partíu ye pa los azules una gran oportunidá pa frayar esta dinámica, al igual qu’asocedió l’añu pasáu col trunfu n’El Molinón gracies al gol de Borja Sánchez, y tomar aire pal tramu final de la Liga. El Sporting, pela so parte, nun se pue permitir la mala imaxe amosada nos trés últimos duelos de rivalidá y buscará la revancha de la ida, cuando'l trunfu quedó nel Carlos Tartiere Nuevu por 1-0 con un gol de Tejera de penalti.

El balón va echar a rodar a les 18.15 hores coles cámares de Vamos d’úniques testigues. A l’afición, poro, tocara-y velo pela tele en casa o nos chigres, coles terraces como la opción preferida pa siguir el nuesu derbi.

Contador Estadistiques