Sporting 5 - Ferrol 3

El Sporting, ensin l'apuru d'andar echando cuentes pa subir o non a primera, metió ayeri la goleada más grande del añu. Nel primer tiempu, los d'Acebal metieron cuatro goles, y, anque xugaron tola segunda parte con diez por espulsión de Cobas, entovía pudieron meter el quintu y da-y asina una alegría, fuera de tiempu, a l'afición que lleva tol añu viéndolos dexar puntos en casa a lo bobo. Claro qu'enfrente tuvieron al Ferrol, un equipín curiosu pero que xuega cola defensa mui adelantada, dexando munchos furacos pa que pase per ellos una delantera revolviona como la el Sporting, que ta fecha a xugar a la contra. Lo más curioso del alcuentru foi al acabar la primer parte, cuando'l porteru del Ferrol foi a pidir al árbitrio que-y punxere tarxeta encarnada a Cobas por supuesta agresión. L'arbitrio fízo-y casu al porteru gallegu, pero de la qu'esti reculaba pa la meta Dorado vio que nun-y daba tiempu a llegar y devolvió-y la gracia tirando un balón dende más de 60 metros que supunxo'l 4-1. Nel segundu tiempu los gallegos descolocaron un poco a un Sporting que, ensin Cobas yá nun yera'l gran conxuntu de la primer parte, poniendo en marcador un preocupante 4-3, pero los de Xixón metiéronse a xugar peles bandes y enseguida llego'l quintu gol. El sextu tuviéronlu Villa y Pablo Álvarez, pero nun llegaron a metelu.