Soto Rei recupera la Nueche Folk tres cuatro años de parón

La música asturiana ta de norabona. L’agora curtiu calendariu de nueches folk nel país amplíase gracies a la Banda Gaites Soto Rei, que recupera la de so tres cuatros años de parón. La BG Marino Tapiega, Cerezal y N’Arba actúen esti vienres.

 

La falta de perres nun contestu de crisis económica frenó nel 2010 la que sería la sétima edición de la Nueche Folk de Soto Rei tres contar un añu enantes cola presencia de Tejedor y los bretones Doolin. N'ediciones previes tamién pasaren por esta población de La Ribera l’escocés Fred Morrison, los irlandeses Neff Brothers, los madrilanos Boys of the Hill y los asturianos Tuenda, Héctor Braga o’l dúu formáu por Lisardo Prieto y Igor Medio, ente otres formaciones. “Esti añu, tres cuatru de parón, l’Ayuntamientu dionos un emburrionín económicu y decidimos retomar l’entamu de la Nueche Folk”, esplica Adrián Fernández Gavela, presidente de la Banda Gaites Soto Rei, agrupación responsable tamién, dende’l 2003, de la organización de les fiestes del pueblu nel que s’encuadra la Nueche Folk.

 

Un conciertu de música de los escolinos de la Escuela de Música Mieres na Casa Cultura va abrir los festexos a les 19.30 hores, pa continuar cola I Xornada de los Callos y, yá a les 23 hores, cola Nueche Folk. El cartelu d’esta edición nueva ta formáu pola Banda de Gaitas Marino Tapiega, la banda folk de formación reciente y bona crítica Cerezal y N’Arba, grupu referente del folk del país que se torna a xuntar pa esta cita especial nun tiempu nel que nun abonden les nueches folk. “Nel 2008 habría unes venti y agora queden unes poques, como Porcía y, equí cerca, Fitoria o la Folixa de Mieres”, recuerda Fernández Gavela, que nagua por que la iniciativa de la banda gaites de Soto Rei pueda ser xerme de la recuperación o creación d’otres nueches folk n’Asturies. Al memu tiempu, anima a la xente a que s’avere a La Ribera pa disfrutar d’una folixa onde reina’l “bon ambiente y na que, en munches ocasiones, el DJ que zarra la fiesta tien que parar la música pa que suene la gaita”.

 

XI Alcuentru de Música Tradicional

 

La Nueche Folk protagoniza la nueche de los vienres, pero’l sábadu ye’l tiempu de les bandes de gaites. Asina, a les 20 hores, depués d’una xornada festiva onde destaca la I Carrera de Montaña Sierra de Llagos (11 hores), una arrozada asturiana (14.30 hores), xuegos pa nenos y nenes (17 hores) o l’actuación d’El Koku La Mazana (18 hores), tien llugar l’Alcuentru de Música Tradicional, eventu que la organización pudo caltener too esti tiempu por mor de la collaboración ente bandes de gaites y agrupaciones folclóriques. Nesta edición, amás de la formación llocal, van tomar parte la Banda de Gaitas Mariano Tapiega, la Banda Gaites Conceyu Llangréu y el Grupu de Baille Les Ayalgues d’Ayer. Darréu, la folixa va continuar hasta bien entrada la madrugada.