Sospecha énte un proyectu pa campu de golf

El Colectivu Ecoloxista d'Avilés denunció esta selmana la intención de facer un campu de golf en Ranón, conceyu de Sotu'l Barcu, al llau del aeropuertu d'Asturies. El grupu condena l'actitú de silenciu del Conceyu énte un proyectu qu'aseguren que lleva tiempu amagostándose d'espaldes al pueblu.

El grupu conservacionista pidió-y información al respective del proyectu, que vien acompañáu de la construcción d'un hotel nesta parroquia rural, al Conceyu. Na carta entruguen si esiste dalgún estudiu d'impactu pa librar de daños al entornu onde vaya asitiase esta instalación y piden que la superficievafectada sía la menor posible. Los ecoloxistes sospechen abiertamente de la esistencia d'intereses especulativos y piden que se busque l'interés xeneral "y non el particular de quien consigue enormes beneficios mercando a 6 o 12 euros y vendiendo a 120 o 300 euros dempués de consiguir una reclasificación". Los ecoloxistes avilesinos nun son a creer les declaraciones del alcalde del conceyu que dixo públicamente que nun sabía de la esistencia del proyectu, tres del que los ecoloxistes aseguren qu'hai dellos grupos d'interés.

El grupu ecoloxista diz que "nun hai intermediariu inmobiliariu que pierda tiempu y perres en facese con opciones de sobre terrenos non urbanizables que tendríen de recalificase ensin saber que van contar col preste del equipu de gobiernu del Conceyu" . El grupu pide que se mire pola sostenibilidá d'estos proyectos, los recursos d'agua que consumen, l'impactu sobre los recursos naturales, el paisaxe, la fisonomía del mediu rural o'l dañu a espacios protexíos y non solo a los intereses inmobiliarios, pidiéndo-y al conceyu de Sotu'l Barcu dexe de "xugar al despiste cuando ye claro que lleva tiempu col tema de les negociaciones".



Nun contestu más xeneral, el grupu remembra la esistencia d'un auténticu báramu de proyectos asemeyaos "cola complicidá de los conceyos" citando los casos de Gozon, y Corvera. El colectivu asegura que dellos d'estos proyectos yá tan en construcción ensin toles llicencies pero "los Ayuntamientos nun ponen torgues pa ello porque son parte de la trama"