Soria repite nel Manuel Nevado con un rellatu n'asturianu que s'avera "a la realidá de les muyeres mineres"

Per tercer añu siguíu la victoria absoluta del Concursu de Microrrellatos Mineros Manuel Nevado Madrid, de la Fundación Juan Muñiz Zapico, que va pola so decimoséptima edición, foi pa un testu n'asturlleonés. La firma correspuende al mesmu autor que lu llevó na ocasión pasada, Denis Soria, agora con un testu ambientáu "nel desconocíu pasáu mineru" de Llanera que s'avera "a la realidá de les muyeres mineres dende una perspeutiva sincera".

Si na edición anterior del concursu internacional billingüe qu'entama dende'l 2004 la Fundación Juan Muñiz Zapico de Comisiones Obreres d'Asturies mereció'l primer premiu con 'Caliente', nesta ocasión recibió'l reconocimientu con 'La picadora'. "Ye un cuentu inspiráu n'Olvido, la picadora d'Al Fabeiru, pero ambientáu nel desconocíu pasáu mineru del conceyu de Llanera. Aprovechando como fondu la represión política y llaboral nos momentos posteriores al fracasu de la Revolución d'Ochobre, nel rellatu entemécense histories y personaxes reales p'averase a la realidá de les muyeres mineres dende una perspeutiva sincera", esplica Soria.

Sobre'l fechu de volver a llevar esti gallardón de sonadía apuntó tar "sorprendíu porque esti rellatu nun tenía tantu ritmu como'l del añu pasáu, pero ye verdá que'l tema y el conteníu yera más complexu. Nun quería cayer un rellatu bobalicón y paternalista, y préstame que'l xuráu supierar valorar el trabayu qu'había detrás". Ye amás el tercer añu, tres el so trunfu del añu pasáu y el del lleonés Armando Gutiérrez Rodríguez hai dos con 'Roceanu', nel que nesti concursu nel que participen decenes d'obres en castellanu gana un testu n'asturlleonés: "Debemos sentinos mui arguyosos de la calidá de la lliteratura na nuesa llingua", reclama.

Más reconocimientos pa testos n'asturianu

El xuráu del gallardón presidiólu'l caderalgu de Literatura Benigno Delmiro Coto, y formáronlu Ana María García García, Ángel Enrique Fernández González, Álvaro Granda Cañedo, Idoya Unzueta García, Eduardo Urdangaray y Antonio González Abúlez. La recompensa pal ganador ye de 300 euros, amás d'un llote de llibros y un grabáu de Manuel Calvo.

150 euros, más llibros, recibe'l meyor testimoniu históricu, que llevó Francisco 'Paco' Álvarez, con otru testu n'asturianu, 'Pozu Cantábricu'; y 100 el meyor escritu por menores de 18 años, que foi pa Elia Zapico por 'Tesoros'. El xuráu, que destacó la calidá de los rellatos presentaos, dio menciones especiales a otros trés testos n'asturianu: María Esther Alonso, por 'L'alma del carbón'; Aique Rodríguez López, con 'Semeyes'; y Sergio Buelga, que presentó 'Pelear carbón'.