“Soplen vientos gallegos na política española y igual tienen que rectificar sobre l’asuntu llingüísticu n’Asturies”, alvierte Cofiño al PP

“Tengan cuidao nel PP asturianu con esti mou d’aproximase al asuntu llingüísticu n’Asturies”, dirixóse’l vicepresidente Juan Cofiño a Álvaro Queipo nuna interpelación urxente, “y yá sabe vusté esa perceición que tien el señor Feijóo sobre’l fechu llingüísticu”. El secretariu xeneral popular centró la so intervención nel informe sobre la oficialidá.

“Interpelo güei sobre la xestión económica del personal dependiente del Principáu d’Asturies nel casu d’implantase la oficialidá del asturianu y del eonaviero, pero como s’imaxinará, y sé que se lo imaxinó, pretendo que la cuestión vaya dalgo más allá”, principio Queipo, que centró tola so intervención no que llamó ‘informe Piñán’. Precisamente la conseyera de Cultura, Política Llingüística y Turismu, a la que diba dirixida dicha interpelación, ta aisllada al ser positivo por COVID-19, motivu pol que respondió Cofiño.

Refirióse al ‘Estudiu sobre'l marcu afayadizu pa la planificación y desarrollu de la normalización del usu de la llingua asturiana y el gallego-asturianu nel ámbitu del Principáu d'Asturies’ como’l “descubrimientu d’un escándalu democráticu productu d’una actuación absolutamente ausente d’ética, honradez y llealtá parllamentaria”, afirmando darréu que la oficialidá amable “nun esiste”. “Nun se fixo nengún análisis” del informe “porque nun se faen evaluciones na Alministración sobre futuribles”, respondió Cofiño, qu’añadio que “la oficialidá pasa per equí –en referencia a la Xunta Xeneral– y pol Congresu de los Diputaos” y que “a partir d’esa declaración de cooficialidá habría qu’implementar esi modelu concretu; y a partir d’esi modelu concretu l’Executivu debería facer los análisis y previsiones al respeuto, pero non enantes de conocer el modelu que vustedes van definir”.

“Ye un informe que’l Gobiernu nun fixo suyo”, siguió’l tamién conseyeru d’Alministración Autonómica, Mediu Ambiente y Cambiu Climáticu, “porque discrepa respetuosamente de dalgunos de los sos conteníos, y yo personalmente tamién discrepo”, polo que nun s’incorporó “a nengún espediente alministrativu que llegara a Conseyu de Gobiernu”. Nesti puntu, esplicó que “al Conseyu de Gobiernu nun van informes, van espedientes alministrativos que vinculan xuridícamente”, y “cuando una conseyería, un órganu xestor, considera que debe sacar alantre una política concreta o proyeutu concretu, impúlsalo siempre abriendo esi espediente alministrativu que s’acompaña de los informes que son necesarios, cuasi siempre xurídicos, de función pública, d’intervención, de presupuestos…”.

“Y a partir d’ehí hai un últimu filtru que se llama Comisión de Secretarios Xenerales Téunicos que velen pola llegalidá de los espedientes que van acceder al Conseyu de Gobiernu, ellabórase l’orde del día per parte de la secretaría del Gobiernu, de la que soi responsable yo, y yá lleguen a la mesa del Conseyu de Gobiernu p’adoptar les decisiones correspondientes. Esti asuntu nun llegó a la mesa del Conseyu de Gobiernu”, aseguró Cofiño.

Pa finar la so primer respuesta, el vicepresidente dirixóse a Queipo pa dici-y que “tengan cuidao nel Partido Popular asturianu con esti mou d’aproximase al asuntu llingüísticu n’Asturies” porque “soplen vientos gallegos na política española y yá sabe vusté esa perceición que tien el señor Feijóo sobre’l fechu llingüísticu, acaso tengan que rectificar en plazu breve”.

"Apreciamos la llingua asturiana y l'aprendizax en llibertá”

Na réplica’l secretariu xeneral nun tocó esti tema y centróse en duldar n’afirmación del presidente Adrián Barbón de que nun conocía l’informe. “Nesti Parllamentu hai grupos que sofiten la oficialidá y fáenlo, dende’l mio puntu de vista, con tol respetu y con tol so derechu. Nós evidentemente sostenemos la postura contraria, y dientro de la postura contraria hailos que desprecien la llingua asturiana y hailos qu’apreciamos la llingua asturiana y nos gusta la so promoción, usu y aprendizax en llibertá. Y dientro de les dos postures hai una intermedia que ye la del usu illexítimu de la política llingüística por parte del Partido Socialista, nuna postura d’ambigüedá permanente”, criticó.

“Si l’informe Piñán vusté lo conocía y nun lo elevó a Conseyu de Gobiernu, sinceramente despiértanos munches duldes. Si nun lo conocía será porque la conseyera nun se lo dio a conocer” y, nesi casu, “supongo que vustedes pidirán por desllealtá’l cese de la propia conseyera”, reclamó Queipo.

Por último, Cofiño insistió na so esplicación del procedimientu pol que lleguen al Conseyu de Gobiernu los informes. “Nun hai casu, ye un informe más como hai centenares que se piden na Alministración a diariu”, qu’en munches ocasiones nun acceden a Conseyu de Gobiernu “porque nun son útiles a la política que se ta impulsando nesi momentu”, sentenció’l vicepresidente.

“Una mala semeya como persona”

Tamién inteperlló ayeri VOX al Conseyu de Gobiernu, en concreto “en materia de política llingüística, con especial referencia al estudiu sobre la planificación y desendolcu de la normalización del usu de la llingua asturiana y el gallego-asturiano nel ámbitu del Principáu d’Asturies”. Na so intervención el voceru Ignaciu Blanco duldó de la enfermedá de Piñán, lo que llevó a Cofiño a espeta-y “que la intervención que fixo fai-y a vusté una mala semeya como persona, yá non como políticu, como persona. Duldar del estáu de salú d’un persona, qu’amás se pue acreitar, diz mui poco de vusté”.

Na imaxe, Cofiño. Semeya obra d'Armando Álvarez.