“Somos un país pequeñu que tenemos muncho qu’ufrir nel escaparate que ye l’Interceltique de Lorient”, destaca Santianes

|
Cartelu XLVIII Festival Interceltique de Lorient

Un centenar de persones va formar parte de la delegación asturiana del XLVIII Festival Interceltique de Lorient, que va celebrase na población bretona del 3 al 12 d’agostu. Asturies torna a llevar una representación de luxu nesta edición dedicada a Cymru.

“Conformamos una bona delegación, con grupos en forma que van dexar bien altu’l pabellón”, apunta Iñaki Sánchez Santianes, responsable de la mesma. Dos bandes de gaites, la Villaviciosa-El Gaitero y l’ayerana El Gumial, y el candasín Grupu de Baille Tradicional San Félix conformen la representación asturiana na Gran Parade des Nations Celtes y nes nueches máxiques, anguaños nomaes Nuit Interceltique Bretagne, a lo qu’hai que sumar los intérpretes Ramón Prada, José Manuel Tejedor, y Luis Núñez y Los Folganzanes.

La madrugada del día 3 van viaxar en trés autocares hacia An Oriant la mayor parte de los músicos asturianos pa llegar esi mesmu vienres, primer día del certame dirixíu pol asturianu Lisardo Lombardía, y comenzar el sábadu a dexar amueses del nuesu folclor. Va estrenar la presencia del país Jesús Fernández González, ganador del Trophée Mac Crimmon del 2013 y del 2016, con una clase maestra de gaita xunto col gallego Pepe Vaamonde a les 10 hores nel Palais des Congrès.

Nel mesmu llugar, a les 14.30 hores, va celebrase la trentena tercera edición del Mac Crimmon, qu’enfrenta a gaiteros asturianos y gallegos interpretando pieces de dambos países y bretones, y qu’Asturies vien dominando dende’l 2013. Nesta ocasión ganaron plaza pal concursu, al traviés del Memorial Remis Ovalle, Fernando Vázquez Cárcaba (Lieres), Javier Menéndez González (Avilés), Diego Lobo (Morea) y l’actual campeón, Jaime Álvarez Fernández (La Fresneda).

Decenes de miles de persones

De nueche va tener llugar la pimer Nuit Interceltique Bretagne nel stade de Moustoir, espectáculu que va repetise’l domingu, el martes, el miércoles y el xueves. Yá pela mañana, va celebrase l’actu más importante del festival, con salida del propiu campu del Lorient a les 10 hores, la Gran Parade des Nations Celtes, na que desfilen toles agrupaciones participantes y qu’axunta a decenes de miles de persones peles casi d’An Oriant.

Nel Espace Marine van actuar tanto San Félix como Villaviciosa-El Gaiteru y El Gumial dientro’l ciclu ‘Musiques et danses des Pays Celtes’, siempre a les 14.30 hores. El llunes van baillar los candasinos xunto colos escoceses Strathallan School Pipe Banda y Keltika Dances, y los irlandeses New Ross & Distric Pipe Band; el miércoles los ayeranos con los bretones Bagad de Lann Bihoué, los galeses Côr Meibion Pendyrus y córnicos Kekezza; y el xueves los maliayos colos irlandeses Lisnamulligan Pipe Band, los escoceses Ullapool & District Pipe Band y los gallegos Grupo de Baile Asociación Cultural Saiñas.

Conciertos en dellos espacios

No que se refier a les grupos folk asturianos, l’encargáu d’abril la representación del país va ser José Manuel Tejedor, que va llevar los cantares del so primer discu en solitariu, ‘Miraes’, al Palais des Congrès y al Théâtre de Lorient. La primer actuación va ser el llunes a les 21.30 hores una ‘Soirée Folk’ xunto colos escoceses Gnoss, y la segunda nel Théâtre de Lorient al día siguiente a les 21 hores, nesti casu colos bretones Jacky Molard Quartet.

El martes tamién va tocar Luis Ñúñez y Los Folganzanes, a les 21 hores nel Palais de Congrès xunto colos galeses VRï & Gwilym Bowen Rhys. Los ganadores del Premiu al Meyor Cantar con ‘La ñeve y la esmeralda’ van repetir el xueves, a les 22 hores, nel conciertu de baldre ‘La Bretagne Invite’ con dos formaciones llocales, Erwan Moal et Soïg Siberíl y Trio Roblin Evain Badeau.

Mentes, Ramón Prada va llevar al órganu un poco de la so ‘Noche Celta’ el miércoles a les 21.30 hores na ilesia Saint-Louis dientro del ciclu ‘Musiques à l’Eglise’. Completa la delegación asturiana l’artista Mario M. Martínez, que va participar na Euro Celtic Arte que tien como sede l'Hôtel Gabriel, cola posibilidá de sumar tamién a la Federación Asturiana de Llucha pa presentar una amuesa de llucha baltu, dalgo que se va confimar nos díes próximos.

Recuperación del pabellón d’Asturies

“L’Interceltique ye’l mayor escaparate que pue tener Asturies de cara a los países del Arcu Atlánticu, el festival más potente del mundu d’esti calter. Somos un país pequeñu, con un potencial mui grande, que tenemos muncho qu’ufrir nesti escaparate”, asegura Sánchez Santianes depués de repasar l’alineación de luxu que viaxa a Breizh. “Ye mui importante tar equí pa poder amosar la nuesa cultura a los países del Arcu Atlánticu, non sólo no musical sinón tamién no gastronómico o turístico, y tamién conocer lo que se fai n’otros llugares y deprender idees nueves”, añade.

A ello, amás de l’amplia representación musical que va tar presente nel festival bretón, va ayudar la presencia, depués d’un añu d’ausencia, del pabellón d’Asturies. La iniciativa privada de Jesús Adrián va permitir que la sidra torne a correr per An Oriant mientres el festival pa disfrute de bretones y los munchos visitantes de toles naciones celtes al certame, ente ellos un numberosu grupu d’asturianos.

Melandru, grupu de rock esperimental en llingua asturiana, va ser la banda residente del pabellón, que va contar con una variada programación musical. Amás, les persones que s’averen al mesmu van poder disfrutar de productos típicos asturianos y recoyer información turística.

‘Asturianaes’

Fuera de la delegación asturiana, tamién va haber un güecu pa la música del país dientro de la programación del festival. Trátase d’una collaboración ente los bretones Locoal Mendon avec le Bagad Roñsed-Mor y Clara Diez Márquez, Verónica Fueyo y Caldo y Os Rabizos col nome ‘Asturianaes’, el vienres a les 21 hores nel Théâtre de Lorient.

Otra manera, ente los conciertos más nomaos d’esta edición destaca’l de Manic Street Preachers, amás de los de Yann Tiersen Solo, Elephant Sessions, Daori Farell Trio y Gilles Servat, éstos dos últimos con entraes escosaes.

Contador Estadistiques