Somos propón la creación d'un Serviciu de Normalización Llingüística n'Uviéu

El conceyal Fernando Villacampa pide que tenga calter tresversal, qu'asegure los derechos llingüísticos y que desendolque un Plan de Normalización - La capital ye la única de les 3 grandes ciudaes asturianes qu'inda nun tien un serviciu dedicáu al asturianu

Nun comunicáu de prensa Villacampa, un conocíu militante nel movimientu de recuperación llingüística, recuerda que "la normalización del idioma ye ún de los puntos d’alcuerdu de los grupos de gobiernu SOMOS Uviéu, PSOE y IU" y pide algamar un consensu sobre la forma que tienen de tener les midíes de normalización.

Dende SOMOS Uviéu proponse un Serviciu de Normalización Llingüística "atendíu por persones capacitaes llingüística y técnicamente nunes condiciones de trabayu iguales al restu de servicios" y pal qu'esperen sacar unes places estables de trabayu.

La formación venceyada a Podemos propón qu'esti serviciu tea asitiáu na Conceyalía d’Información y Participación por ser la so propia naturaleza tresversal y por tar representada pola vicealcaldesa d’Uviéu, y que seya una ferramienta de planificación, xestión y asesoramientu "non sólo pa que se fale de lo asturiano n’asturianu sinon tamién de dinamización de campañes en toles árees de gobiernu".

El Serviciu, como lu entiende Somos, tien de ser la estructura que desendolque un Plan de Normalización Llingüística acordies al Conceyu d’Uviéu.

Villacampa calca na so argumentación nel calter tresversal de serviciu, que tendría d'amestar "un plus a la marca municipal al traviés del respetu a los derechos llingüísticos de los asturianos y asturianes y del apueste pol patrimoniu llingüísticu y cultural nun sentíu ampliu".

Uviéu, una anomalía

Uviéu ye la única de les trés grandes ciudaes asturianes qu'inda nun tien un Serviciu de Normalización Llingüística. En Xixón existe la Oficina de Normalización Llingüística y n'Avilés funciona la Estaya de la Llingua. La capital d'Asturies ye ún de los pocos conceyos del país que tampoco tien aprobáu el so espediente toponímicu.