Somos Oviedo refuga les felicitaciones “cíniques y güeques” de la FSA

“El cambiu foi posible n’Uviéu non gracies a Javier Fernández, sinón a pesar d’él y la FSA”, diz Somos Oviedo, que refuga les felicitaciones “cíniques y güeques” a lo sos conceyales.

La candidatura de xunidá popular, que colos sos votos y los d’Izquierda Xunida al candidatu del PSOE Wenceslao López permitieron frayar 24 años de gobiernos municipales del PP n’Uviéu, considera que’l sábadu “trunfó la xenerosidá, l’altor de mires y l’interés xeneral perriba de la política vieya del revanchismu y los intereses partidistes de la FSA”. “El cambiu foi posible n’Uviéu a pesar de Javier Fernández y el so partíu, qu’una vegada más amosaron que prefieren ceder Uviéu al PP pa evitar problemes cola derecha asturiana”, continúa Somos nun comunicáu nel que celebren la derrota de “Javier Fernández, Mercedes Fernández y tolos qu’históricamente intercambiaron cromos a costa de la ciudá”.

Ana Taboada, candidata de Somos Oviedo, emponderó a López, al que califica de “socialista honestu”, y apunta que “ye’l tiempu d’una política nueva na que lo importante antepóngase a les sigles y los puestos”. La intención de la candidatura de xunidá popular ye la d’esplicar en conceyu a los sos simpatizantes y votantes les razones de les decisiones tomaes el sábadu y tratar la posibilidá d’entrar nel gobienu municipal, propuesta que punxo López enriba la mesa.

Tripartitu nel gobiernu

L’alcade socialista d’Uviéu propunxo tanto a Somos Oviedo como a IX la posibilidá de formar parte del gobiernu de la ciudá. Güei van entamase los alderiques ente les trés fuercies, pero la intención de López ye treslladar la distribución de les responsabilidaes municipales en proporción cola representación municipal. El PSOE algamó nes eleiciones del 24 de mayu cinco ediles, uno menos que Somos, que sumó seis. IX cuenta con trés.