Somos gana les primaries de Podemos Asturies

Daniel Ripa va ser el primer secretariu xeneral de Podemos Asturies al sumar un 68,49 por cientu de los votos de les primaries de la formación. La candidatura de Somos Asturies que lideraba l’aragonés y que sofitaba Compromisu por Asturies ocupó la totalidá de los puestos pal Conseyu Ciudadanu y la Comisión de Garantíes.

L’investigador en paru de 33 años natural de Chaca y residente n’Uviéu superó de manera amplia a María José González Suárez, representante de la otra corriente mayoritaria en Podemos, Asturies Sí Puede. “N’Asturies, el cambiu ta a la vuelta la esquina y al alcance de les nuestres manos”, señaló Ripa tres conocer la so victoria y los importantes datos de participación nestes primaries: 5.610 votos. El yá secretaríu xeneral algamó un total de 3.395.

No que respeuta al Conseyu Ciudadano, Emilio León foi la persona más votada foi con 3.329 apoyos. Los 33 puestos restantes ocúpenlos el restu de persones integraes na candidatura de Somos Asturies, ente los que tán el cantante de Dixebra, Xune Elipe; el periodista y editor Paco Álvarez; el maestru cofundador de Xunta Moza, Lluis Miguel Orviz; l’escritor José Ángel Gayol; la editora Silvia Cosio; el maestru Nacio González, y el gaiteru José Fernando Díaz. Completen los cargos Andrés Ron, Fini López, Manuel Carrero, María Hernández, Fernando de Dios Moreno, Laura Tuero, Lorena Gil, Pelayo García, Cristina Blanco, Nora Isabel Espina, Lucía Montejo, Néstor Fernández, David González, Noelia Martínez, Orlando Fernández, Emilio León, Paula Valero, Kike López, Inés González, Pablo M. Testa, Mar García, Jara Cosculluela, Elena Herrera, Beatriz González, Antón Díaz y Rosa María Espiño.

Somos Asturies tamién ocupa la totalidá de cargos de la Comisión de Garantíes, que va tar formada por Gemma Elena Arbesú –la más votada, con 2.014 apoyos–, María Cristina Majado, Nieves Cigales, José Joaquín Fernández Pérez, Daniel Prado y José Antonio ‘Josan’ de Pariza.