Somos Avilés nun se fía de la Fundación para el Aprendizaje del Español

L'organismu col que'l PSOE llocal quier convertir Avilés nun llugar de referencia pa deprender castellanu "podria convertise nun chiringuitu onde colocar persones afines".

La partida de presupuestos apurre a la Fundación para el Aprendizaje del Español 20.000 euros pa la dotación fundacional y 60.000 pa la subvención de funcionamientu. Asina, el PSOE avilesin pretende poner en marcha ún de les sos promeses eleutorales: "Vamos facer d'Avilés un espaciu de referencia internacional pal aprendizaxe y perfeicionamientu del castellanu. Contará con un sistema pedagóxicu innovador qu'atraerá a la nuesa ciudá personas procedentes de tol mundu a deprender y perfeicionar el so conocimientu del castellano con persones natives. Será un motivu importante pa venir a la ciudá y con ello pretendemos impulsar al sector turísticu. Queremos que se convierta nun oxetivu de ciudá cola implicación y participación activa del sector turísticu, hosteleru, y comercial".

Somos Avilés denuncia que la creación d'una Fundación pa desendolcar esti proyeutu nun s'especificaba nel programa, catalogando esti tipu d'organismos de "alministraciones paraleles qu'escapen del control plenariu". "La Fundación pue convertise nun chiringuitu onde colocar a persones afines o a antiguos cargos socialistes", teme Primi Abella, voceru de la candidatura de xunidá popular, que recuerda que n'agostu l'equipu de gobiernu munipal consiguió "llibrase de los incumplimientos de la llei de contratos públicos nel casu Waterhouse cuando la Fundación Niemeyer asumió la contratación de l'actuación que'l Conceyu aniciara irregularmente y asina pudo zarrar l'espediente. Somos Avilés yá nun pudo acceder a les cuentes de la Fundación Niemeyer a pesar de que l'Ayuntamientu ye patronu".

Por último, apunta que "del sistema pedagóxicu innovador qu'atraerá a persones de tol mundu nada se sabe; la propuesta nun va acompañada de más detalle. Nun hai un plan d'actuaciones que xustifique la necesidá de constituyir la Fundación en llugar d'ofrecer esi serviciu dende la Oficina de Turismu del Conceyu y, pa ello, reforzala con personal nuevu".