Somos Avilés edita 'El Parche' pa "averar la realidá político-social avilesina a tolos habitantes d'esi conceyu"

'El Parche' trátase d'un periódicu "abiertu, plural y comprometíu" que va tener trés númberos al añu y que destaca por da-y un tratamientu de normalidá a la llingua asturiana. Un especial sobre la 'trama del agua' protagoniza la primer entrega.

La filosofía y l'enfotu de la espublización editada pol grupu municipal de Somos Avilés ye, como s'indica nel editorial, "aumentar la ufierta informativa de la ciudá faciendo énfasis naquellos temes que pasen más desapercibíos nos medios tradicionales". Darréu apunta que 'El Parche' naz col oxetivu de "informar del llabor na corporación de les y los conceyales d’esta agrupación d’electores, pero tamién aportar y afondar en temes vitales pa la ciudadanía avilesina y treslladar los debates del Plenu a la cai".

Nesti primer númberu destaca l'especial de la 'trama del agua', qu'afeuta especialmente a Avilés, amás d'un informe sobre la ordenanza fiscal del IBI pal 2016; una entrevista al historiador local Pablo Martínez Corral, autor del llibru 'Memoria y olvido en la Quinta Pedregal', sobre la represión franquista n’Avilés; y artículos sobre la contaminación ambiental, la situación de la empresa Alcoa o la necesidá de feminizar la política. Completen los conteníos una valoración del primer añu de presencia de Somos Avilés na corporación, ente otros asuntos.

El tratamientu al asturianu ye otru de los aspeutos destacaos del periódicu, yá que-y da "una normalidá absoluta, con una presencia bultable y siempre con un enfotu normalizador". 'El Parche' nun va emplegar l'idioma "de manera restrictiva, simbólica, folclorizante o diglósica" y sí va tener espaciu en caúna de les seiciones del periódicu. "Ésta ye una muestra más del compromisu de Somos Avilés col asturianu, que dende’l primer momentu vien siendo ún de los sos elementos distintivos y que supón una novedá na vida política avilesina", afirmen dende la candidatura de xunidá popular.

Tirada de 5.000 exemplares

'El Parche ' va tener trés númberos al añu, con una tirada d’al menos 5.000 exemplares, que se van distribuyir de baldre per tolos barrios y llugares del conceyu avilesín.