Somos Avilés demanda al Conceyu que recuerde a Marcos del Torniello nel 80 aniversariu de la so muerte

Esti 2018 cúmplense 80 años de la muerte de José Manuel García González, escritor avilesín que ye conocíu pol so alcuñu lliterariu, Marcos del Torniello. Somos Avilés va treslladar al Plenu un ruegu pa que’l Conceyu que faiga una alcordanza institucional del autor.

La candidatura de xunidá popula recuerda que Marcos del Torniello “foi ún de los representantes fundamentales de la escena lliteraria en llingua asturiana –anque tamién escribió en castellanu– de primeros del sieglu XX, adscritu a la corriente 'rexonalista' d'aquella época y a la llamada poesía costumista”. Apunta que tuvo mui venceyáu sentimental, profesional y lliterariamente a Avilés, “al que-y dedicó bona parte de la so obra y que siempre tuvo presente nel so facer” y cita obres como ‘Tambor y gaita’, ‘Orbayos de la quintana’ –“publicáu por soscripción popular”– o la comedia titulada ‘La esfoyeta’, “estrenada na nuestra ciudá en 1906 y escrita a pidimientu de la Coral Avilesina”.

“Pero, ensin dulda, la so composición más conocida ye ‘Gozoniega’, conocida popularmente como ‘Soi de Verdiciu’, que llegaría hasta los nuestros díes convertida nuna pieza clásica del repertoriu musical asturianu”, destaca Somos Avilés. Poro, nel ruegu al Plenu, solicita que “s'entame por parte del Conceyu d'Avilés, de manera institucional, dalgún eventu, actu o asemeyao, que faiga alcordanza y conmemore la so figura”.