SOMA-FITAG-UXT espulsa del sindicatu a Fernández Villa

José Luis Alperi, secretariu xeneral de SOMA-FITAG-UXT, anunció la espulsión de José Ángel Fernández Villa del sindicatu. La Fiscalía Anticorrupción investiga al llangreanu.

La razón ye l'orixe d'una cantidá de 1,4 millones d'euros que'l sindicalista tapeció a Facienda y que podría tener una procedencia ilícita, motivu que llevó a Javier Fernández a espulsalu esta mañana de la FSA-PSOE. Poques hores depués, tres una reunión de la executiva de SOMA-FITAG-UXT prevista güei, Alperi anunciaba la mesma midida y pidía que la investigación llegue hasta'l final. Na comparecencia énte los medios tamién afirmó que ye Fernández Villa'l que debe dar esplicaciones y señaló qu'esta xornada ye la más complicada pal sindicatu nos sos más de cien años d'historia.