Softastur ufre’l primer webmail n’asturianu: OpenMailBox

El coleutivu Softastur nun apara na so xera d’ufrir a los usarios software llibre en llingua asturiana. L’avance últimu ye’l trabayu desendolcáu con OpenMailBox, el primer webmail n’asturianu, que destaca pola so seguridá y privacidá.

La diferencia principal d’OpenMailBox con Thunderbird –tamién n’asturianu– ye qu’esta ferramienta permítenos xestionar el nuesu corréu electrónicu en cualquier PC con conexón a la rede al traviés del restolador, lo que ye mui útil cuando nun utilizamos l’ordenador propiu. Sicasí, tamién ufre la posibilidá de descargar el corréu con un xestor de correos –Softastur recomienda’l Thunderbird– al tener serviciu IMAP y SMTP, tanto en PC como nun teléfonu intelixente. Na páxina web del coleutivu asturianu informen sobre los pasos necesarios pa rexistrase y abrir una cuenta n’OpenMailBox, que destaca pola so seguridá, el respetu de la privacidá y l’ausencia de publicidá, amás de por ser de baldre y n’asturianu dafechu.

Otra manera, la selmana pasada Softastur espublizó una anovación de Telegram, aplicación de mensaxería nel intre en llingua asturiana. Ésta ha de facese de forma manual, al igual que la instalación primera, y inclúi notes de voz y el guardáu de multimedia en llugares más afayadizos. L’ésitu de la versión asturiana de Telegram ta siendo importante, con alredor de 7.000 descargues en poco más de quince díes.