Softastur anuncia una versión nueva de l’aplicación ‘Diccionariu’ p’Android con delles meyores

|

Android Market tien a disposición de los usuarios una versión nueva de l’aplicación ‘Diccionariu’ pa los móviles qu’usen esti sistema operativu, según anunció esti martes Softastur nel so blogue. Ésta trae delles meyores y ye de baldre.
 
L’aplicación trátase d’un diccionariu en llinia basáu nel Diccionariu de l’Academia de la Llingua Asturiana (DALLA) y incorpora tamién un conxugador y traductor tamién basáu nes definiciones del Eslema. Ente les meyores que presenta esta versión nueva destaca una meyora importante de la interfaz gráfica y una allixeración del códigu fonte. Tamién corrixe un bug qu’afeutaba al arranque del dispositivu móvil en dalgunes terminales y permite cambiar ente diccionariu, conxugador y traductor eslizando ente pantalles.
 
Otres novedaes son el desaniciu de la publicidá y de los permisos tocantes a la privacidá y l’habilitación de la función de rotación de la pantalla nes funciones de busca. Por último, l’aplicación permite guetar dende la tecla INTRO del tecláu. Les persones que quieran disfrutar nel so móvil d’esti ‘Diccionariu’ pueden descargalu de baldre nesti enllaz.

Contador Estadistiques