Sofía Castañón defende'l plurillingüismu na tribuna del Congresu

Recitó a Berta Piñán y fixo referencia al ésitu de Rodrigo Cuevas na so intervención.

El martes VOX llevó al Congresu una proposición non de llei "rellativa a l'aplicación y desarrollu del artículo 3 de la Constitución española per aciu l'adopción de les midíes necesaries p'asegurar el deber de conocer el castellanu, del derechu a usalu y de la so aplicación a les persones físiques, xurídiques y a toles Alministraciones y instituciones públiques del Reino de España". La postura de Xuníes Podemos foi defendida pola diputada asturiana Sofía Fernández Castañón, que dende la tribuna d'oradores emponderó'l plurillingüismu nuna intervención mui aplaudida dientro y fuera del hemiciclu.

La xixonesa principió con un cachu del poema 'Lección de gramática' de Piñán, escritu "na llingua na que falo col mio fíu, na llingua que falaba'l mio güelu, na llingua que cientos de miles d'asturianos y asturianes falen, falamos, tolos díes", unos versos "que falen de la capacidá que tienen les llingües pa que nos entendamos", esplicó depués. Tamién rellató que pa pronunciales pidió permisu a la presidenta del Congresu, Meritxell Batet, depués de que se retirara la pallabra a dellos diputaos por usar la so llingua materna.

"Agradézovos que nos dean esta opción pa reafirmanos. Que la nuesa realidá ye plurillingüe vese cada vegada que Rodrigo Cuevas, pa cantar n'asturianu, escosa les entraes dos meses enantes n'Alicante", apuntó Fernández Castañón pa darréu dar otros exemplos al respeuto. "Equí siguimos falando, lleendo, cantando nes llingües de los pueblos y pidiendo, cada xeneración con más enfotu, los derechos que nos correspuenden como falantes", añadió.