Socialistes y IX-BA-LV llegaron a un alcuerdu de Gobiernu pa Xixón

José Manuel Sariego (PSOE) y Jesús Montes Estrada (IU-BA-LV) dieron anuncia ayeri de que les sos formaciones llegaron a un alcuerdu pa gobernar conxuntamente'l conceyu de Xixón, primer ciudá asturiana por númberu d'habitantes. El soterramientu del ferrocarril y la construcción de la estación Intermodal van ser les dos grandes obres de la llexislatura, recoyendo'l pautu l'ampliación de la superficie afectao pol del Plan de Víes y abriéndose la puerta a que'l soterramientu puea llegar hasta Veriña nun futuru.

La coalición d'izquierdes tamién llogró que'l conceyu se comprometa a facer un estudiu pa la creación d'un tranvía na ciudá, mientres que les principales aveníes de Xixón van acoyese a un plan de movilidá que va incluyir la creación de carriles pa bicicletes.

L'alcuerdu recueye no tocante a política llingüística que vuelva a crease un conseyu asesor de la Oficina de la Llingua y que se lleven a plenu les ordenances y Plan d'usu de la Llingua, que tendrán de redactase acordies a la llegalidá vixente, según sorrayó'l responsable socialista.