Skontra va presentar oficialmente el so discu nuevu na sala Savoy

El 5 de marzu ye la fecha escoyida pol grupu de punk-folk Skontra pa presentar oficialmente en Xixón el so tercer trabayu d’estudiu, ‘Mazcando miseries’. Va ser un conciertu especial, con delles collaboraciones y sorpreses.
 
Tres la xira pelos Países Baxos y Alemaña del mes d’avientu col discu nuevu baxo’l brazu, Skontra ta preparando con enfotu’l conciertu de presentación oficial de ‘Mazcando miseries’ n’Asturies, que coincide cola celebración de los diez años de la banda. Por ello, el públicu que s’avere al Savoy va poder disfrutar d’una actuación enllena de collaboraciones y sorpreses, como la presencia d’ex miembros del grupu. Amás, Txema Selektah va pinchar clásicos nel descansu del conciertu. El comienzu de l'actuación ta previsto pa les 20.30 hores y el preciu de la entrada va ser de 5 euros, 10 col 'Mazcando miseries' incluyíu.
 
Tres esta actuación, Skontra va facer una serie de conciertos que va llevar al grupu a Basauri (19 de marzu), La Pola L.lena (25 de marzu) y Comillas (16 d’abril). Pal mes de setiembre, la banda tien confirmada la so presencia por primer vez nel festival Aúpa Lumbreiras!!, que se celebra en Tobarra (Albacete). Otra manera, Skontra tien puesto en marcha un concursu nel que sortea tres regalos qu’inclúin entrada pal conciertu de Xixón, discu y camiseta. Los interesaos han de mandar un corréu electrónicu a contacto@skontra.net col nome y apellíos enantes del 27 de febreru.