Skontra graba’l so cuartu discu, ‘Foguera’

La banda de punk-folk Skontra ta estos díes trabayando na grabación del que va ser el so cuartu álbum d’estudiu, de nome ‘Foguera’. La llingua asturiana va tener un pesu mayor nesti discu autoeditáu que va ver la lluz en mayu y nel que collabora Fernando Madina, cantante de Reincidentes.

“Ye’l que más tiempu nos llevó preparar y col que tamos enfotaos en que recueye lo meyor de nós”, apunten dende’l grupu sobre ‘Foguera’. El punk-folk va ser l’estilu predominante nos once cantares –más dos bonus track– del discu con pingarates de hardcore, ska, reggae y rock, y lletres reivindicatives más direutes tanto n’asturianu como en castellanu, anque nesta ocasión la llingua del país va tener mayor presencia nos testos. La banda anuncia tamién sorpreses y collaboraciones especiales, como la del andaluz Madina o la de Ramiro (40 Barrotes) y Juan G. Villamil (Adizión Etilika y Spanta la Xente) a les guitarres.

Los integrantes de Skontra lleven dellos díes somorguiaos na grabación de los cantares nos estudios ACME baxo la producción de Miguel Herrero. El discu, autoeditáu como ye norma na banda, conviértese nel cuartu trabayu d’estudiu de la banda tres ‘Semeya de la rabia’ (2006), ‘Cantares pa dempués d’una guerra’ (2008) y ‘Mazcando miseries’ (2010), a los qu’hai que sumar la maqueta grabada nun ensayu nel 2003. Los siguidores de la banda podrán disfrutar de ‘Foguera’ en mayu, mes nel que los asturianos van participar en Comillas nel II Beltane Fest xunto con otra banda de la tierra, Desakato, y Habeas Corpus, Los Chikos del Maíz, Karne Cruda y Rat-zinger. Va ser el día 30 nel pabellón municipal d’esta población cántabra con entraes a 15 euros anticipada y de 18, na puerta.