Skontra actúa esti vienres en La Pola L.lena

El grupu de punk-folk Skontra va llevar al escenariu del Teatru Vital Aza los cantares del so discu nuevu ‘Mazcando Miseries’ y los sos temes más clásicos. El conciertu va principiar a les 20.30 hores y la entrada ye de baldre.
 
Tres l’ésitu de la xira per Holanda y Alemaña, y del conciertu del Savoy, el pasáu 5 de marzu, nel que celebraron el so décimu aniversariu como banda, el grupu asturianu sigue cola so xira de presentación del so tercer trabayu d’estudiu, ‘Mazcando Miseries’, que tamién lu llevó la selmana pasada a Basauri. A la cita de L.lena, que tien como sede un teatru, dalgo a lo que nun tan avezaos los sos integrantes y siguidores, van seguir una riestra importante de feches: Comillas (16 d’abril), Sopuerta (2 de xunetu, Mendebala Jaialdia),Valencia de Don Juan (23 de xunetu, Festival IslaRock) y Tobarra (24 de setiembre, Festival Aúpa Lumbreiras!!).
 
Otros conciertos interesantes de la fin de selmana son los de Marlango (21 hores, Universidá Llaboral) y 13 bats (23.59 hores, Savoy), esti vienres; y los de Tontxu ( 20 hores, Centru Cultural Valey de Piedras Blancas), Ismael Serrano (20.30 hores, Teatru Xovellanos) y Kozmics (23.59 hores, Savoy), el sábadu. Yá de domingu, a partir del meudía, el Centru de Cultura Antiguu Institutu de Xixón va acoyer una xornada nueva los ‘Domingos corales: l’añada asturiana’. Nesta ocasión van actuar la Coral Luis Quirós y l’Orfeón Xixónés.